2988/2022-2023

Champhai, the 8th December, 2022: District Research Office (DRO), Economics & Statistics Champhai bultumin vawiin chawhma dar 10 khan DRO Training Hall, Champhaiah Registrar of Births & Deaths (RBD) te tan Civil Registration System (CRS) chungchanga hriattur tulte inzirtirna training buatsaih a ni a. He hun hi District Registrar of Births & Deaths Pu James Lalrinchhana, District Bawrhsap chuan khuallian niin a hmanpui a ni.

Khuallian District Registrar of Births & Deaths Pu James Lalrinchhana chuan Registrar of Births and Deaths (RBD) te chu khawtlanga nu rawn leh pa rawn ber berte an nih thu sawiin, Booth Level Officer (BLO) ni tel bawk an awm nual chuan an pawimawh zia a tarlang a ni, a ti a. RBD te chu ram leh hnam tana him tur chin thliara uluk taka hnathawktu leh kawngkharpui vengtu 'gatekeeper' pawimawh tak an nih thu sawiin, ram leh hnam hmangaihna, chhia leh tha hriatnate sawrbinga Pathian rawn chung zela huaisen taka kal turin a chah a; a ti tha leh dan tlawhchhana kalte District Administration-in a thlawp tlat dawn thu a sawi a. Document lem hmanga voter's ID neih tum leh dan kalha chetlak tum an awm thin thu leh manchhuah an nih fo thin thu sawiin, a hmasa bera lo dang theitute chu RBD te an nih avangin theihtawp chhuaha ngaihtuahna seng thin turin a chah a. An bial chhunga chengte chinchang hriaa chhui chiang turte leh dik nia an hriatah huaisen taka tang ngam turtein a fuih a. Naute pian laia nu leh pate nihna leh khua leh tui neihna hriat a pawimawh thu sawiin, ram dang mi kan rama piang nazawngte khua leh tui anga pawm theih an nih loh dante a tarlang a. Document siam danglam thin forgery case hnuaia man chhuahte kum hnih chhung lungin tan leh lei chawi tir theih an nih thu a sawi a. RBD te chu document pek chhuah leh form pawimawh fill up dan fimkhur taka endik thin turin a chah bawk.

District Bawrhsap chuan khua leh tui dik takte electoral roll-a an luh theih nan document neih ngaite an lo neih fel lawk diam a tul thu sawiin, RBD leh BLO te chu hemi kawngah hian khua leh tuite hnena inzirtirna tam zawk pe thin turin a chah a, electoral roll-a felfai phawt chuan inthlanna felfai leh thianghlim kan nei thei dawn a ni, a ti a. Tih dik tawk lo leh insiamthat ngaihna laite siam tha a, rinawm leh dik taka thawk turin RBD te a chah a, "Pathianin hna tha tak min pek hi kan eizawnna mai nilo rawngbawlna a ni a, mi dik takte hnena an chanpual pek hi kan mawhphurhna a ni a, chutiang rilru pu chung chuan huaisen leh dik takin i thawk ang u", tiin kalkhawmte a sawm a. Mithiamte zirtirnate ngaipawimawh tur leh hriat lohte zawh hreh nei lova training hlawkpui tum turin RBD te duhsakna a hlan a ni. 

Thusawitu dang Pi Esther Leihang, SDC chuan DC Office, DRO Office leh RBD te inkarah thawhhona tha chhawmnun chhunzawm zel a tul thu sawiin, Electoral Roll ennawn leh siamthat hna kalpui mekah document fel lo dapchhuah kawnga tanlak ho anih thu leh thawhhona tha tak hnuaiah birth certificate lem engemawzah man chhuah tawh anih thu a sawi a. RBD te chu registration felfai leh rintlak tak chhawmnung zel turin a chah a, ramri depa awm kan nih avangin fimkhur zual angai a ni, a ti bawk. Khua leh tui dik tak naupiang an hnena inziahluhna chang hre lo an awm pawha ngaihvena thin turin RBD te chu a chah nghal bawk.

He hun kaihruaitu Pu Lalthlamuana Fanai, DRO Champhai chuan hun chep leh buai tak kara RBD thahnem takte training-a an tel thei chu lawmawm a tih thu a sawi a. Champhai District-ah RBD 64 an awm mek thu sawiin, Champhai District chu report pek leh hmalak kawnga a ti tha berte zinga mi anih thu sawiin, RBD te chu an hna kalpui pangngai bakah daily report pek ngai pawimawh theuh turin a chah nghal bawk.

Vawiin RBD Training-ah hian Civil Registration System (CRS) chungchanga hriattur pawimawh hrang hrangte Pu H.Lalhmangaiha, Inspector; Pi Lallianpuii, UDC leh Pu Vanromawia, DPA te'n an zirtir a. Zawhna leh chhanna hunte hman a ni a, RBD te Birth & Death Register leh Certificate-te enfiah anih bakah hnathawhna hmanruate sem chhuah a ni bawk.

CRS Training-ah hian Champhai District chhunga RBD 58 te an tel thei a ni.