2987/2022-2023

Aizawl 8th December 2022: Vawiin khan Parliament thlasik thutkhawm neih mêkah Rajya Sabha MP Pu K.Vanlalvena chuan ZERO HOUR ah thu sawiin Mizoram leh Tripura a loneitu tam tak kuhva chingtute harsatna thu a au chhuah pui a.

Pu K.Vanlalvena chuan kum tam tak kal tawh atangin Mizoram leh Tripura tlangmi  mipui tam takin kuhva chin hi eizawnna pui bera an hman thin thu sawiin heng state pahniha kuhva chingtu te hian vanduai thlak takin kumin chhung hian India ram state dangah te an kuhva thar chhuah an hralh theih loh thu Parliament House a hriattir a. Pu Vena chuan Mizoram leh Tripura loneitute thar chhuah kuhva te chu India sawrkar, Ministry of Home Affairs thupek hmuin Assam sawrkar mi leh sa ten Assam ram chhungah lo tidingin an lo man thin tih a sawi a.Official thenkhatte report a a lan dan chuan South East Asia ram atanga kuhva ro tam tham tak Myanmar kaltlanga India ram a lo luh thu leh heng hi Central sawrkar chuan tihtawpa lo dan chah a tum niin a hriat thu Pu Vena chuan a tarlang a. Ram dang atanga kuhva lo lut tihtawp chu tha a tih thu leh North East mite kuhva thar chhuah erawh chu India ram khawi hmunah pawh zalen taka hralh chhuah phalsak tur a nih thu te, foreign  kuhva leh India ram kuhva chu hriat pawlh loh tur a nih thu leh, Hmarchhak bial hi ram dangah kan ngai a nih si loh chuan hmarchhak bial atanga kuhva thar te chu zalen taka hralhchhuah a ni tur a ni, tiin Pu Vena chuan House ah hian a sawi chhuak a ni.

Pu Vanlalvena hi tun hnaiah a kheimit ruh zai a nih avangin Parliament session hi wheelchair a țhu chungin a tel a  ni.