3788/2024-2025

Lunglei, 2025 Pawlkut thla ni 14: Vawiin khan Directorate of Economics & Statistics Aizawl leh District Research Officer, Lunglei ṭang kawp huaihawtin Govt J. Buana College Multipurpose Hall, Lungleiah piang leh thi chhinchhiahtute intuai tharna, "Annual Training of Registrar of Births & Deaths (RBD)" buatsaih a ni a. Lunglei District Additional Deputy Commissioner Pu James Miahlung chuan khuallian niin a hmanpui.

Pu James Miahlung chuan birth certificate leh death certificate chu sawrkarah lehkha pawimawh tak a nih avangin a pek chhuah kawngah fimkhur a ṭul thu a sawi a. Ram leh hnam himna, Mizoram himna chu RBD-te kutah thui tak a innghat tih sawiin, ram leilung fa ni lote hnena birth certificate pek chhuah a nih loh nan RBD-te chu ṭan la turin a chah a. Mipuite rawngbawlsaktu an nihna zawnah theih tawpa mipuite lo ṭanpui ṭhin turin a chah a ni.

He hun hi Lunglei District Research Officer Pu Tc. Jonunsanga'n a kaihruai a. Economics & Statistics hnuaia Inspector of Statistics pahnih - Pu Vanlalfinga leh Pu C. Lalhmangaiha te'n RBD-te tana hriat tur pawimawh hrang hrang leh form hman dan te an zirtir a. Zawhna leh chhanna leh sawi hona hun hman a ni bawk.

Vawiina annual training-ah hian Healthy Lunglei District Campaign hnuaiah natna inkai chhawn theih loh, non-communicable disease (NCD) chungchang zir hona buatsaih nghal niin, UHWC Sethluna Medical Officer Dr Malsawmtluangi chuan NCD - cancer, zunthlum, BP sang, heart attack, stroke leh lung natna te laka inven dan leh vei lo tura fimkhur a ngaih dan te a sawi a. Lunglei Civil Hospital-a thawktute'n kal khawmte hriselna dinhmun an endiksak nghal a ni.