3789/2024-2025

Aizawl dated 14th January 2025: Vawiin chawhnu khan Secretariat Conference Hall, MINECO-ah krismas leh kumthar vuakvet a halpuah leh halmawi khuahkhirhna kalpui dan thlirletna hun ‘Review Meeting of Prohibition of Fire Crackers and other Pyrotechnic material’ neih a ni a. Home Minister Pu K.Sapdanga’n he hun hi kaihruaiin Pu Khilli Ram Meena, Chief Secretary, Pu Anil Shukla, DGP, Home Secretary, Environment, Forest & Climate Change Department, Mizoram Pollution Control Board, General Administration Department, I&PR Department, Health & Family Welfare Department, Deputy Commissioner, Superintendent of Police, Aizawl, Fire & Emergency Services, Aizawl City Local Council Association, Central Young Mizo Association leh Home Department-a thawktute an tel a ni. 

Home Minister Pu K.Sapdanga chuan Mizoram boruak vawn thianghlim zel tumna avanga krismas leh kumthar vuakvet a halpuah leh halmawi khuahkhirhna kalpuina kawng a sawrkar, kohhran leh tlawmngai pawl thawhhona leh hmalakna fakawm a tih thu sawiin hmasawnna nasa tak hmuh tur a awm chu lawmawm a tih thu a sawi a. Thlirletna hun pawimawh tak kaltlang hian hmalak chhunzawm dan tur ruahmanna tha tak duan chhuah ngei a beisei thu a sawi.

Vawiin thlirletna hun a tarlan danin Mizoram pum a halpuah leh halmawi kaihhnawih thupek bawhchhiatna avanga case ziah luh 55 zing a 48 chu Aizawl district huam chhung ami a ni a. Lungleiah case 1, Champhaiah 5, Serchhipah 1 a awm a. Heng thubuai kaihhnawih a bungrua man khawm hlutna hi Cheng nuai 24 a chuang a ni. Pollution Control Board atanga tarlan danin Aizawl khawpui a Kum 2023 Dec ni 31 zan a boruak thianghlim lam tehna, Air Quality Index (AQI) chu 597 a nih laiin kum 2024 Dec ni 31 zan ah erawh 115 a ni a, Mizoram district hrang hranga AQI Manual Station atanga a lan danin district dangte pawh AQI 50 hnuai lam ah a awm deuh vek thu tarlan a ni a, Mizoram chu India ram a boruak thianghlimna ber State ni tur a tan lak a pawimawh thu sawi a ni. Health & Family Welfare Department tarlan danin kumhlui thlah zan khan, Aizawl Civil Hospital-ah halpuah leh halmawi avanga inhliam leh harsatna tawk, Damdawi in a inentir an awm lo a ni.

Thutkhawmnaah hian Home Department, Aizawl DC Office, YMA leh kohhran kaltlang a hmalakna kalpui dan te ngaihthlak a ni a. Media leh Social media tangkai tak a hman a nih thu te tarlan a ni. District Headquarters huam chhung a halpuah leh halmawi hal ve miah lohna veng/khuate chu lawmpuina thuziak pek vek nise tih rel a ni a. Halpuah leh halmawi khuahkhirhna kalpui zel dan tur ruahmanna siam turin ‘Working Committee’ din ni se tih rel a ni bawk.