1820/2024-2025

2024 Thlazing ni 29: Vawiin khan Mizoram Lokayukta leh Mizoram Journalists' Association (MJA), Lunglei District te buatsaihin Sub-Headquarters YMA Hall, Lungleiah 'Anti-Corruption Awareness Campaign 2024' hun hman a ni.

Anti-corruption awareness campaign hun hi Mizoram Lokayukta Chairperson Pu Lalmalsawma IAS (Rtd) chuan kaihruaiin, kal khawmte lawmna thu leh Lungleia awareness programme buatsaih a nih theih nana Lunglei District MJA te'n ruahmanna ṭha tak an siam avanga lawm thu a sawi a. India ramah hlemhletna leh ei rukna (corruption) dona atan Lok Pal chu hun rei tawh tak aṭangin hman a lo nih tawh thu leh state-ah chuan Lokayukta hman ve thung a nih thu sawiin, Mizoramah pawh March ni 11, 2019 khan Lokayukta hi din ṭan a ni, a ti a. Mizoram Lokayukta chu Member awm thei turte awm kim tawhin, thawktu lamah erawh duhthusamin a la famkim lo va, zawi zawiin thuam chak mek zel a ni, a ti.

He hunah hian Mizoram Lokayukta Member Pu Joel Joseph Denga MJS (Rtd) chuan thu sawiin, kan ram hma lam hun atan corruption do chu a pawimawh hle a ni, a ti a. Dik taka tih leh dik taka nun chu Pathian duh dan a nih avangin ringtute tan phei chuan corruption do chu kan mawhphurhna leh tihmakmawh a ni, a ti.

Lunglei District Bawrhsap Pu R. Lalṭhazuala pawhin thu sawiin, Lungleia anti-corruption awareness campaign buatsaih a ni chu District tan thil lawmawm tak a ni, a ti a. Corruption hian India ram mai bakah Mizoram ngei pawh min chenchilh tih phat rual a ni lo tih sawiin, Mizorama ei rukna leh hlemhletna dona kawnga hma la tur Lokayukta-in a taka ṭha taka hna an thawk thei ta chu a lawmawm hle a ni, a ti a. Corruption hian hmasawnna a tihkhaihlak bakah, sawrkar inrelbawlna ṭha nei turin a hnawksak a, heti ang a nih avang hian mipuite ṭang rualin kil hrang hrang aṭangin kan ram tiṭhuanawptu hi kan do a ngai tiin, official-te pawh lang tlang tak leh rinawm tak a hna thawk turin a chah a. Mimal tinin corruption do hi nunpui a, mahni aṭang theuhva bul ṭan a ṭul a ni, a ti.

Vawiina Lungleia anti-corruption awareness campaign buatsaihah hian sawrkar department hrang hrang thawktute, tlawmngai pawl hrang hrang ai awh leh zirlai pawl ai awhte telin, Mizoram Lokayukta-a Assistant Public Prosecutor Pu R. Laltharliana chuan corruption awmzia leh ram tana nghawng ṭha lo a neih dan te bakah, a dona kawnga hma lak dan tur leh corruption do tura official, NGO leh khua leh tuite mawhphurhna a zirtir a. Mizoram Lokayukta dinhmun tlangpui tar langin, case 65 an neih tawh aṭangin case 44-ah preliminary enquiry tih tawh a nih thu leh mi pathum thiam loh chantir an nih tawh thu a tar lang bawk a. Zawhna leh chhanna hun hman ni bawkin, Mizoram Lokayukta Member Pu Lalsanglura MPS (Rtd) chuan lawm thu sawiin hun a khar a ni.