1068/2022-2023
Lunglei the 28th, June' 2022 : India ram zalenna kum 75 lawmna kal zelah vawiin khan Lunglei Civil Hospital, OPD ah Antyodaya Campaign 2022 hawnna hun hman a ni. Lunglei Bawrhsap Pu Kulothungan A, IAS chu khuallian niin a hmanpui.

Antyodaya Campaign 2022 hawnna hun hi Dr. SR. Ngurchamliana, Medical Superintendent, Civil Hospital Lunglei chuan kaihruaiin khuallian Pu Kulothungan A chuan Health & Family Welfare leh Social Welfare Department te buatsaih Antyodaya Campaign 2022 hawnna hun hman a ni hi lawmawm a ti a, sorkar laipui scheme pawimawh tak pakhat Antyodaya rualbanlo te tan a hamthatna dawn theihna chhawpchhuah zinga Lunglei District a tel hi hmang tangkaia, rualbanlo a tam thei ang ber he scheme a inziak lut turin a duh a, Lunglei ah hian Medical Board din sa awmin hemi hmang hian Health & Family Welfare leh Social Welfare Department ten thawhhona tha tak nen rualbanlo zawnchhuah hna thawk a, Lunglei khawpui chhung leh khawpui pawn atanga rualbanlo a tam thei ang berin he hamthatna an dawn theih nan hmalak sak a, Identity Card leh Smart Card te siamsak in, hamthatna hrang hrang an dawn theih dan ngaihtuahsak a ngaih thu a sawi a ni.

Azadi Ka Amrit Mahotsav puala India ram District 75 thlanchhuah zingah Antyodaya scheme hmang thei tura Lunglei District hi tel a ni a, hemi in a tum ber chu rualbanlo te zawnchhuah a, medical board in natna benvawn nei 40% chin te chu rualbanlo ngei anih tih finfiah hnuah Identity Card leh Smart Card siamsak in sorkar laipui atanga hamthatna hrang hrang an dawng thei dawn a ni. Rualbanlo te zawnchhuah hna hi Lunglei khawpui chhunga Lunglei North, Lunglei West, Lunglei East leh Lunglei South ah kalpui phawt ani ang a, hemi zawh ah hian Sub Division leh Block hrang hrang khua ah te kalpui a ni ang.