2013/2024-2025
2024 Mimkut thla ni 11: Vawiin khan Indian Council of Agriculture Research (ICAR) Research Complex for NEH Region, Mizoram Centre, Kolasib leh Animal Husbandry & Veterinary Department, Lunglei District leh Krishi Vigyan Kendra (KVK), Lunglei te ṭang ho huaihawtin District Animal Husbandry & Veterinary Conference Hall, Lungleiah ar vulh kal tlanga kut hna thawktute khawsak tihhmasawn a nih theih dan tur zir hona leh Tribal Sub Plan (TSP) kal tlanga ar vulh ṭanpuina semna, "Livelihood Improvement of Tribal Farmers through Backyard Poultry Farming cum Input Distribution under Tribal Sub Plan" hun hman a ni.
He hun hi India Sawrkar Laipui Ministry of Agriculture and Farmers Welfare hnuaia Tribal Sub Plan (TSP) kal tlanga buatsaih a ni a. ICAR, Mizoram Centre, Kolasib-a Senior Scientist (Vety. Public Health) Dr Blessa Sailo chuan inlawmna thu sawiin, Tribal Sub Plan hnuaia kut hna thawktute tana hma lakna hrang hrang a tar lang a ni.
AH & Vety Lungleia Joint Director (Southern Zone) Dr Lalmakthanga chuan Lungleiah ICAR-in training an buatsaih leh kut hna thawktute tana ṭangkai tur ar note, ar chaw, ar chaw pekna, ar tui pekna leh ar damdawi chi hrang hrang te an sem chu lawmawm a tih thu a sawi a. Mizoramah ram dang aṭanga ar note lak luh a nasat thu te, ar vulh kawngah state a la intodelh loh thu leh hmasawnna tur a la tam thu te sawiin, Lungleiah ar 48,000 vel vulh ang leh thla tin ar 13,000 talh ang a nih thu leh Hnahthialah ar 28,000 vel vulh ang leh thla tin ar 4,500 talh ang a nih thu a sawi a. Ram dang aṭanga ar la lut lo va, mahni vulh ngeia intodelh chu mi rama sum luang chhuak tur venna leh mahni ram chhunga sum che vel tihtamna a nih thu sawiin, chu chu ram sum leh pai dinhmun tiziaawmtu a nih theih tur thu a sawi.
Lunglei DAH&VO Dr Ngurzidingi Sailo chuan ICAR hma laknaa kut hnathawktute tana training hlu tak buatsaih a ni chu lawmawm a tih thu sawiin, ṭangkai tak leh hlawk taka kut hna thawktute'n an hman ngei a beisei thu a sawi a. KVK Lungleia Senior Scientist & Head Dr Henry Saplalrinliana chuan hlawk taka ar chi ṭha chi (rainbow rooster) vulh tura hma la turin kut hna thawktute a fuih a. Hlawk zawka ar leh ran vulh tur chuan mi thiamte rawn thiam a pawimawh thu a sawi bawk.
He hunah hian kut hna thawktu mi 50 (Lunglei aṭangin 29, Haulawng aṭangin 1 leh Hnahthial aṭangin 20) te hnenah an mamawh chi hrang hrang ar note, ar chaw, ar chaw pekna, ar tui pekna leh ar damdawi chi hrang hrang sem chhuah a ni a. KVK Lungleia Subject Matter Specialist (Animal Science) Dr David Malsawmdawngliana chuan hlawk zawka ar enkawl dan zirtirna a pe a. ICAR, Mizoram Centre, Kolasib-a Senior Scientist (Vety Microbiology) leh Co-Nodal Officer (Tribal Sub Plan) Dr Lalhruaipuii chuan lawm thu sawiin hun a khar a ni.
Attachment
- Loading attachment...
