3402/2024-2025

2024 Pawltlak thla ni 6: Vawiin khan Lunglei District Sainik Welfare leh Mizoram Ex-Services League, Lunglei te chuan Armed Forces Flag Day 2024 pualin Lunglei khawpui chhunga office hrang hranga mi inphalte hnen aṭangin Armed Forces Flag Day Fund-a chhun luh tur thilpek an khawn.

Armed Forces Flag Day hi India ramah kum tin December ni 7-ah hman ṭhin niin, India sipaite leh veteran-te hriat rengna ni atan leh sipaite ram tana an inpekna ram mipuite'n an hriatpuina leh zahna lantir nan hman ṭhin a ni a. Kumin hian Inrinniah a tlak avangin December ni 6, 2024 (Zirtawpni)-ah hman a ni.

Armed Forces Flag Day hian mipuite hnen aṭangin thilpek (voluntary donation) khawn ṭhin niin, thilpek petute hnenah car flag, sticker leh lapel badge te pek ṭhin a ni a. Donation khawn hi Armed Forces Flag Day Fund-ah chhung khawmin, a sum hi sipai ramtuileilo, non-pensioner leh an chhungkua harsa tak takte ṭanpuina leh welfare scheme hrang hrangah hman ṭhin a ni.

Armed Forces Flag Day-a ṭanpuina thilpek khawn hi India ram mipuite inpekna lantirna leh ram tan an thawh let ve a ni tih lantirna a ni a. Vawiina Lungleia Armed Forces Flag Day puala thilpek khawnah hian Lunglei High Powered Committee Vice Chairman Pu V. Malsawmtluanga MLA, Lunglei District Bawrhsap Pi Navneet Mann, Lunglei District & Sessions Judge Pu Vanlalenmawia, Deputy Inspector General of Police (Southern Range) Pu Altaf Ahmad Khan, Lunglei District Superintendent of Police Pu J. Lalmuankima, 2nd Bn MAP Commandant Pu Francis Lalnuntluanga Ralte, Project Director DRDO Pi ST Lalvensangi leh Sub-Divisional Officer (Sadar) Pi TT Beikhaizi te chuan thilpek an pe a ni.