3401/2024-2025

Aizawl, the 6th December, 2024: A.H & Vety. Minister Pu C. Lalsawivunga chuan vawiin chawhnu dar 1:00 khan JB Foundation din ran chhanchhuahna leh enkawlna hmun, Animal Shelter, Bungbangla chu tlawhin hmalaknate a enfiah. Minister hi Animal Shelter dintu Pi Ramzirsangi leh a thawhpuite'n lo dawngsawngin an hmalak dante an lo hrilh a ni.

A.H & Vety. Minister Pu C. Lalsawivunga chuan JB Foundation te'n ran baihvai leh khawngaihthlak tak takte la khawma anmahni enkawlna hmun tha tak an siam chu lawmawm a tih thu sawiin, a hlawhtlin theih nana mi inpe leh tlawmngai, ran hmangaihtute hmalakna fakawm a tih thu a sawi a. Ran baihvai leh tuamhlawm ngaite enkawlna hmun changtlung zawk siam turin CSR fund buaipui kawngah theihtawp chhuahpui a inhuam thu a sawi bawk.

Animal Shelter, Bungbangla hi JB Foundation enkawl niin, ran hmangaihtute leh mi tlawmgaite sum thawhkhawm tlingkhawm hmanga enkawl a ni a. Tun dinhmunah hian Ui 49, Zawhte 18, Kel 1 leh Zawng 1 te'n he hmunah hian enkawlna an dawng mek a. Heng rante hi mi enkawl chhunzawm theih loh, tihduhdah tuar avanga enkawl chhunzawm tura lak leh damlo enkawl mumal theih loh lakkhawmte an ni tlangpui a. A hmun hi A.H & Vety. Department-in hun tiam chhung neia a hawh tir a ni.

Hemi hnu hian A.H& Vety. Minister chuan JB Paws Veterinary Hospital, Zemabawk a tlawh bawk. 

Pu C. Lalsawivunga hi Dr. F. Lalramhluna, Addl. Director (VS&PH), Dr. Robert Rualthankhuma, Dy. Director (P&M), Dr. Lalfamkima, Dy. Director (VE&E) leh Dr. C. Neihthangpuii, Dy. Director (VPH) te'n an tawiawm a ni.