2657/2024-2025
2024 Khuangchawi thla ni 23: Vawiin khan Lunglei District Agricultural Marketing Committee (DAMC) huaihawtin Lunglei DC Conference Hall-ah mipuite khawsak chawi kan nana Mizoram sawrkar ruahmanna thar, Mizoram Bana Kaih (Handholding) Scheme hnuaia thlai thar zawrh leh hralh kalpui dan tur zir hona, 'sensitisation cum consultation meeting' buatsaih a ni.
He hun hi DAMC Chairman, Lunglei District Bawrhsap Pu R. Lalṭhazuala chuan kaihruaiin, kal khawmte lawmna thu a sawi a. Lunglei DAMC bul ṭanna turah Mizoram Agricultural Marketing Board (MAMB) lamin an uap thei chu lawmawm a tih thu sawiin, an kaihhruainain DAMC pawhin a tih tur tluang taka a kalpui theih a beisei thu a sawi a. Bana Kaih chu Mizoram sawrkar ruahmanna pawimawh tak a nih angin hlawhtling taka kalpui a nih theih nan member-te'n ngaihtuahna seng tlang tura chahin, kut hna thawktute leh hma thar latute bana kaih bakah, an mamawh anga kaihhruaina pek leh thlai thar hralhna ngaihtuahpui kawngah te mahni zawnah ṭheuh theih tawp chhuah turin a chah a ni.
He hunah hian MAMB member, Dr Robert Lalrinsanga, Deputy Director, Horticulture Department chuan powerpoint presentation hmangin Bana Kaih scheme hnuaia thlai thar chhuah chi li - sawhthing, aieng, hmarcha leh hmunphiah lei leh hralh (market) kalpui dan tur ruahmanna a sawi fiah a. MAMB co-opted member & DAMC member Pu Daniel Lalawmpuia'n thlai thar lei leh hralh chungchanga hriat tur pawimawh hrang hrang a tar lang bawk a. Bana Kaih hnuaia hma latute thlai thar chhuah zawrh dan tur ruahmanna hrang hrang - thlai chingtute'n society-a intel khawm a, sawrkar hriatpui society kal tlang ngeia thlai thar hralh a ṭul dan te, society kal tlanga thlai hralhna buaipui theih loh china sawrkar inrawlhna tur te, sawrkarin thlai man dona (support price) a pek theih dan leh chumi atana chhinchhiahna fel tak neih a ṭul dan te bakah, he'ng ruahmanna hrang hrang kalpui kawnga DAMC mawhphurhna leh hma lak dan tur hrang hrang zir ho niin, zawhna leh chhanna leh sawi hona hun hlawk tak hman ho a ni bawk.
He hun hi Mizoram Agriculture Marketing Board (MAMB) member-te'n telpuiin, district office hrang hrang - Deputy Commissioner; Rural Development; Agriculture; Animal Husbandry & Veterinary; Environment, Forests & Climate Change; Food, Civil Supplies & Consumer Affairs; Horticulture; Commerce & Industries; Cooperation leh Land Resources, Soil & Water Conservation aṭang te'n official-te leh partner bank pathum - State Bank of India, Mizoram Cooperative Apex Bank leh Mizoram Rural Bank ai awhte an tel a. BDO-te leh line department hrang hrang block office lamte'n online-in an chhim bawk a ni.
Attachment
- Loading attachment...
