2658/2024-2025

Kolasib, the 22nd October, 2024: Vawiin chawhma dar 11:00 khan North East Zone Cultural Cenltre (NEZCC), Dimapur, Ministry of Culture, Govt. of India leh Art & Culture Department, Mizoram tangkawp buatsaihin India rama hnam hrang hrangte inpumkhatna leh hnam ziarang inhriatpawhtawnna leh chawilarna 'Bharat Ko Jano' programme chu Vairengte Jt. YMA Playground-ah hman a ni a. He hunah hian Mizoram Governoar Dr. Hari Babu Kambhampati chu khuallian niin, Nagaland Governor Pu La. Ganesan, Chairman, NEZCC chu khualzahawm a ni.

Khuallian nia he hun hmanpuitu Mizoram Governor Dr. Hari Babu Kambhampati chuan Nagaland Governor Pu La. Ganesan, NEZCC Chairman ni bawk hmalaknaa Mizoram luhka khaw pawimawh tak Vairengtea Bharat Ko Jano program hman a ni chu lawmawm a tih thu a sawi a. Ramri dep Vairengtea chengte chu remna leh muanna vawnnun kawnga mawhphurhna pawimawh tak nei an nih thu sawiin, muanna, rinawmna leh mikhual chunga that chhuah kawnga Mizoram dinhmun chawinungtute an ni, a ti a. Program hlawhtlinna tura theihtawp chhuahtu NEZCC, Art & Culture Department, District Administration leh Mizoram, Assam, Tripura leh Bihar atanga lokal lamthiamte fakawm a tih thu a sawi bawk.

Khuallian chuan kalkhawmte chu Bharat Ko Jano campaign chu tun aia zau zawka kalpui a nih theih nana theihtawp chhuah tura chahin, hemi tur hian India ram chanchin, midangte hnam ziarang leh tihdan phungte zira India ram hnam ziarang hausakna ngaihlu thiam turin a fuih a. North East-ah ringawt pawh hnam peng hrang hrang 200 leh tawng hrang hrang 220 chuang a awm thu tarlangin, hnam ziarang leh nunphungte inhriatpawhtawnna chu kan inpumkhatna tinghettu pawimawh tak a ni, a ti a. India ram chu khawvela economy lian ber 5-na a nih thu leh PM in a lo sawi tawh angin kum 2047 ah chuan ram intodelh 'Vikshit Bharat' kan nih theih nan mipuite chu Sawrker laipui scheme pawimawh tak takte hmelhriata chhawr tangkai tum turin a chah a; hemi kaihhnawih khawihtute pawh inzirtirna theihtawp chhuaha kalpui turin a chah nghal bawk a ni.

Khualzahawm Nagaland Governor Pu La. Ganesan chuan thawhhona thain inlungrualna, theihna nasat zia leh hnam ziarang hausakna a pholan thu sawiin, North East India chu India tana chetlak vel nana hmun pawimawh tak a nih bakah India ram hnam ziarang hrang hrang awmna leh India chanchina thil pawimawh tam tak thlenna leh awmna hmun a ni, a ti a. Hun hman chu hnam ziarang leh tihdan phungte pholanna piah lamah ramri depa inpumkhatna leh hmasawnna thlen nana duan a nih thu a sawi a. Khawtlangah inpumkhatna leh muanna nasa zawk a thlen ngei a beisei thu sawiin, NEZCC Chairman ni bawk chuan North East State-te hnam ziarang leh tihdan phung hausa takte chawilar kawnga Sawrkar laipui leh State Sawrkarte hmalakna chhuanawm a tih thu a sawi bawk.

Bharat Ko Jano Programme-ah hian Dr. Prashanna Gogoi, Director, NEZCC chuan inlawmna thu sawiin Mizoram, Assam, Tripura leh Bihar atangin lamthiamte'n hnam lam chi hrang hrang an entir a ni.

He hunah hian DC Kolasib Pu Robert C. Lalhmangaiha leh Sr. SP Kolasib Pu David H. Lalthangliana te pawh an tel a ni.

Full Speech of Governor Dr Hari Babu Kambhampati : https://dipr.mizoram.gov.in/post/speech-of-dr-hari-babu-kambhampati-honble-governor-of-mizoram-on-the-occasion-of-bharat-ko-jano-vairengte-organized-by-north-east-zone-cultural-centre-nezcc-art-culture-department-govt-of-mizoram-on-23rd-october-2024-at-joint-yma-playground-vairengte