2659/2024-2025

Saitual, the 23rd October, 2024: Vawiin chawhma dar 11:00 khan DC Conference Room Saitualah District Level Nasha Mukt Bharat Abhiyaan Committee chu District Bawrhsap Dr. Lalngura Tlau kaihhruaina hnuaiah an thukhawm a, ruihhlo do kawnga hmalak dan tur hrang hrangte an ngaihtuahho a ni.  

He hunah hian Dr. Lalngura Tlau chuan Natasha Mukt Bharat Abhiyaan (NMBA) chu Drugs Free India tih a nih angin ruihhlo hman sual kawnga theih tawp chhuah turin kalkhawmte a sawm a, hmalakna kawng hrang hrangah pawh district huap rilru zau tak pu turin a chah bawk. Chairman chuan drugs chungchang sawiin tangkai taka hman a nih chuan nuna chhan nan leh kawng tinrenga tangkai taka hman theih a nih laiin hman sual a nih erawh chuan nunna tam tak latu leh khawtlang leh ram tluk chhiatna a ni thei a ni, a ti. 

Vawiin thutkhawmah hian NMBA scheme hnuaia ruihhlo dona atana hmalak dan tur hrang hrangte sawiho niin chung zingah chuan district chhunga school hrang hrang 10 thlanchhuahte atanga Anti-Dugs Club din leh chung school atanga Master Volunteers 50 training pekte, ruihhlo dona atana tlawmngai pawlte leh kohhran thalaite hnena awareness neihte, short clip video leh reels insiamsiak buatsaihte, November ni 14 Children’s Day denchhena district pum huapa “Drug Prevention Awareness” neih te an rel a ni. 

He thutkhawmah hian District Bawrhsap Dr. Lalngura Tlau bakah Pi Christina Lalnunfeli, SDC, Pi F Zodingpuii, DIPRO, Pu R. Lalzirliana, DSP, Pi Jessica Hauzel, CDPO, Thingsulthliah, Pu Micky Lalenkawla, DEO, Pi Chhuanhlupuii, SDEO leh tlawmngai pawl hrang hrang aiawhte an tel thei a ni.