2649/2026-2027

Lunglei, 2026 Khuangchawi Thla ni 13: Vawiin khan Lunglei District Additional Deputy Commissioner Pi Zoramdini kaihhruaiin Lunglei DC Conference Hall-ah "Conservation & Restoration of Catchment Areas of Barak River in the States of Assam, Manipur, Mizoram and Nagaland" tih project kal tlanga Barak lui fintu leh a pengte humhalh leh siam ṭhat dan tur sawi ho a ni.

He ṭhut khawmah hian KfW Barak River Feasibility Study Team bakah, Lunglei District-a a kaihhnawih department hrang hrang official-te an tel a. Study Team aṭangin Pi Vaitheswari Selvam chuan PowerPoint presentation hmangin project chungchang a sawi fiah a. He project hi Government of India leh KfW, Germany ṭang kawpin sum an thawh hmanga hma lakna tur a ni a. Implementing Agency hi North Eastern Council (NEC) niin, Executing Agency chu NERCORMS an ni a. India hmarchhaka state pali – Assam, Manipur, Mizoram leh Nagaland-ah te kalpui tur niin, Mizoramah chuan district 8 – Aizawl, Lunglei, Champhai, Kolasib, Serchhip, Mamit, Saitual leh Khawzawlah te kalpui tura ruahman a ni.

Ram leilung hman dan dik lo leh tuihna enkawl dan ṭhat tawk loh avang te, lui dung enkawl leh humhalh kawnga thawh hona ṭhat tawk loh avang tein Barak lui leh a pengteah harsatna nasa tak a thleng ṭhin a. He'ng avang hian tuihna kiamin, luia nungchate an chereu phah bakah, tui lian, lei min leh harsatna dang a pun phah nasa hle a. He project kal tlang hian Barak lui chhehvelah ramngaw, nungchate leh tuihna humhalh bakah, kut hna thawktute eizawnna leh hmasawnna atan hma lak tum a ni. 

He ṭhut khawmah hian line department-te chu project hlawhtlinna atana theih tawp chhuaha lo ṭawiawm tur leh ṭanpui tura beisei leh ngen an ni a. Line department hrang hrang aṭangin an ngaih dan leh thurawnte ngaihthlak niin, hma lak dan tur hrang hrang sawi ho a ni.

KfW Barak River Feasibility Study Team hian Lunglei District chhunga hma lak theih dan tur zir chiang turin khaw hrang hrang pawh a hmunah an tlawh nghal dawn a. Vawiin aṭang khan zir chianna hi an kalpui ṭan nghal.