2650/2026-2027 

Aizawl dated 13th October 2026: India hmarchhak State tih hmasawnna tura Bank hrang hrang leh Sawrkar hotute inrawnkhawmna hun,'North East Bankers' Conclave 3.0' chu vawiin chawhma khan Mizoram University Auditorium, Aizawlah ‘Fuelling the Growth Engine’ tih thupui hmangin buatsaih a ni a. Shri Jyotiraditya M. Scindia, Hon’ble Union Minister, Ministry of Development of North Eastern Region (DoNER) chu khuallian niin Pu Lalduhoma, Chief Minister, Mizoram chuan a tawiawm a. Prof. Lalnilawma, Rural Development & Administration Minister, Shri Khilli Ram Meena, Chief Secretary, Shri Katikithala Srinivas, Secretary, MDoNER, Shri Satinder Kumar Bhalla, Secretary, NEC, Shri Niraj Kumar, Joint Secretary, MDoNER leh Shri PVSLN Murty, Chairman & Managing Director, NEDFi-te an tel a. India hmarchhak state sawrkar leh Bank hrang hrang aiawhte, Department of Financial Services hotute he hunah hian an tel a ni.

Khuallian Shri Jyotiraditya M. Scindia, Hon’ble Union Minister, Ministry of Development of North Eastern Region (DoNER) chuan North East State-te chu thalai hnathawk thei rual tamna, lehkha thiam, ziak leh chhiar thiam tamna a nih bakah ram leilung hausakna thahnem tak awmna a nih thu a sawi a. Kum 2 leh thla 8 DoNER Minister a nih chhung hian tun tum hi India hmar chhak State vawi 35 a tlawhna a nih thu a sawi a. India hmarchhak State tih hmasawn nan hian Bank leh sawrkar thawhhona a pawimawh thu a sawi bawk a ni.

Khuallian chuan Agartala-a North East Bankers’ Conclave 2.0 buatsaih tuma hmachhawp hrang hrang zingah Bank Branch thar hawn belh te, ATM bun belh te, thingtlang khua bank la awm lohna te chu Bank nena thlunzawm te a tel thu a sawi a. Heng hmachhawp bawhzuina kawngah hian December 2024 leh March 2026 inkar khan Bank branch thar 131 hawn belh a nih thu te, ATM 126 bun belh a nih thu te leh Bank leh Postal service nena thlunzawm tura khaw 9479 chhinchhiah atangin khaw 6905 chu thlunzawm a nih tawh thu a sawi a. Mi tam zawkin banking service tangkai taka an chhawr theih nan mi 3000 tal chenna khuaah chauh Brick-and-mortar Branch din tura inkaihhruaina awmsa chu, North East state tan mi 2000 chin chenna khuaah tih hniam a nih thu a sawi a. India hmarchhak state-a Non-Branch transactions zinga za zela 90.2 chu Unified Payments Interface (UPI) kaltlang a nih thu a sawi. Heng hmasawnna duhawm tak tak a thlen rual hian Shri Jyotiraditya M. Scindia chuan Bank emaw Postal service nena la thlunzawm loh khaw 2574 la awm chu thlunzawm thuai a nih theih nan nasa zawka tan lak a tul thu a sawi.

DoNER Minister chuan NE Bankers’ Conclave 3.0 buatsaih tur hian uluk takin NEDFi leh Department of Financial Services-te nen zirchianna leh ruahmanna siam a nih thu sawiin, DoNER Secretary chuan a mal te tein State tin aiawhte kawmin, target bituk a nih thu a sawi a. Bank-te Credit-Deposit Ratio tih sanna tur target siam niin, Tripura tan 47% atangin 60% ah, Arunachal tan 60%, Mizoram tan 67% a ni, a ti a. CD Ratio tih san chu, State chhunga sum lengvak tih pun a, state tih hmasawnna hmanraw pawimawh tak a nih thu sawiin, CD Ratio lampum pawh hi ‘Credit for Development’ tih nen a intluk hial thu a sawi.

DoNER Minister Shri Jyotiraditya M. Scindia chuan Mizoram chu Digital payment tha taka kalpuina State a nih thu te, PMJJBY leh PMSBY pawh tha taka kalpui a nih thu a sawi a. Chutih rual chuan PM Jan Dhan Yojana leh PM Vishwakarma-a inzial luh kawngah tan nasa zawka lak a pawimawh thu leh, Bank hnathawk dan pawh puk tir lam uar zawnga tan lak a pawimawh thu a sawi bawk a ni. Vawiin NE Bankers’ Conclave 3.0 a sawihona session 4-te thupui chu Last Mile, Loans, Livelihoods leh Lifelines-a then a nih thu DoNER Minister chuan a sawi a, Bank la awm lohna khua chu Bank emaw, Business Correspondents emaw India Post Payments Bank nen a thlunzawm te, MSME leh Women Entrepreneurs-te hnena loan pekchhuah uar zawka kalpui te, kuthnathawktute tana eizawnna ngelnghet thlen thei tur hmalakna kalpui te leh inthlunzawmna leh inkalpawhna tha siam te a tel thu a sawi.

Shri Jyotiraditya M. Scindia chuan vawiin North East Bankers’ Conclave 3.0 chhunga session pali atang hian rawtna sawm (10) theuh leh chu rawtna tih puitlinna tur kawng sawmli (40) duang chhuak turin kalkhawmte a chah a. Chung rawtna hrang hrang tipuitling tur chuan hunbi ruat turin leh tehfung felfai tak duang tura chahin, North East Bankers’ Conclave 4.0 ah chuan hmasawnna nasa zawk chhawpchhuah a nih ngei a beisei thu a sawi.

Mizoram Chief Minister Pu Lalduhoma chuan Bank hnathawh zinga pawimawh ber chu mipui sum kawl that ni lovin mihring dinchhuahna tura remchang siam sak a nih thu a sawi a. Bank leh Financial Institution-te chu ram tih hmasawnna kawnga thawktu pawimawh tak, sumdawnna hrang hrang tichaktu, Entrepreneur-te thuam chaktu, sum peipunna kawng siamtu leh eizawnna ngelnghet siam tura hmanraw pawimawh tak an nih thu a sawi. Kum 2025-26 chhung khan Assam Credit Deposit Ratio chu 73.52%, Nagaland chu 61.1% leh Tripura chu 61% a nih laiin Mizoram chu 55.83% ah a awm thu a sawi a. Hei hian tan lak a ngaihzia a tarlan thu sawiin kum 2028-29 chhung hian 67% kai chho tura tan lak a nih tur thu a sawi.

Pu Lalduhoma chuan Aizawl khawpui chhung mai bakah District dang leh thingtlang lamahte Bank chu, a mamawhtute tana pan awlsama inzarpharh zel a pawimawh thu a sawi a. Mizoram chu loan rul tha tamna State (High Loan Recovery Rate) a nih angin, Bank-te chuan hei hi hmang tangkai thiam turin a chah bawk a ni. Chief Minister chuan Priority Sector Annual Credit Paln 2025-26 thlir chuan Micro, Small and Medium Enterprises (MSME) dawmkanna kawngah tan lak thar a tul thu a sawi a, MSME tih chakna chuan kuthnathawktu leh thalai thiamthil chhawrtlak neite tan eizawnna ngelnget nasa takin a hrin chhuah phah tur thu a sawi. Chief Minister chuan Sawrkar leh Banking Sector-a thawkte inkarah thawhhona neih tir chu a ngaih pawimawh thu sawiin, Mizoram Sawrkar Flagship Scheme- Bana Kaih Scheme-ah pawh Bank panga (5) thawhpui a neih mek thu a sawi a. He hmalakna hian thiamna nei mi rintlakte tan eizawnna siam sakin, ram tan Economic Development a thlen tur thu a sawi bawk a ni.

Chief Minister chuan Bank leh Sawrkar thawhhona a that lehzual nan Mizoram Sawrkar chuan ni 7, September 2026 khan inremsiamna neihpuiin ‘One Department, One Bank’ ruahmanna kalpui tan a nih thu a sawi a. Sawrkar sum enkawlna felfai taka kalpui nan SNA SPARSH, Integrated Financial Management Information System (IFMIS), Reserve Bank of India e-Kuber system leh Public Financial Management System (PFMS)-te chu tha taka kalpui a nih thu a sawi bawk a. Cheque system chu zawi zawia tih bo tum a nih thu a sawi bawk a ni.

Pu Lalduhoma chuan India state dangahte chuan Corporate Social Responsibility (CSR) chu hmasawnna ruhrel siam nan tangkai taka hman thin a nih laiin India hmarchhak State chuan CSR an la dawn tam loh hle thu a sawi a. North east State-te chuan hmasawnna kawng chak zawka an zawh ve theih nan CSR tam zawk a luh a pawimawh thu a sawi.
Chief Minister chuan North East Bankers’ Conclave 3.0 chu mipui thahnem zawk ban phaka Banking Service a awm theih nan te, thalai thiamthil rintlak nei ten eizawnna ngelnghet an neih theih nan leh Entrepreneur-ten chak zawka hma an lak theih nan te, ramin hmasawnna kawng sawt zawka a zawh theih nan sum puk tir kawngah Bank-te chu inhawng zau zel turin a chah a ni.

North East Bankers’ Conclave 3.0 ah hian Shri PVSLN Murty, Chairman & Managing Director, NEDFi chuan Conclave thupui sawi hawnna a hmang a, Shri Katikithala Srinivas, Secretary, MDoNER chuan kalkhawmte lawmna thu a sawiin Shri Manoj Muttathil Ayyappan, Joint Secretary, DFS chuan Power Point Presentation hmangin NE Bankers’ Conclave 2.0 thurel bawhzuina hrang hrang a tarlang bawk a ni. Chawhnu khan Break Out Session pali, Brain Storming Discussion leh Valedictory Session-te neih a ni.