2027/2025-2026

Lunglei, 2025 Mimkut thla ni 8: Vawiin khan Lunglei District Bawrhsap Pi Navneet Mann hovin a hna thawh pindanah Lunglei Deputy Commissioner (Bawrhsap) hma laknaa Lunglei District leh Lungsen Aspirational Block-a Cosmic Class leh zirna tihhmasawnna tura hma lakna hrang hrang hawnna hun hman dan tur thlir ho a ni.

He hunah hian DC Office, District Education Office, I&PR leh Lead Bank official-te, SDO (Civil) Tlabung leh BDO Lungsen te an tel a. Bawrhsap hma laknain, Lunglei District leh Lungsen Aspirational Block huam chhunga zirna tihhmasawn nan – Cosmic Class [Mizoram zirna ina vansang chanchin zirna hmun bik (Astronomy Lab) hmasa ber] te, Learning Bridges [a laklawha zirna bansan (dropout)-te’n zirna an chhunzawm leh theihna tura hma lakna] te, Book Nest Initiative [thingtlang zirlaite tana zirlaibu leh thawnthu bu hlui khawn khawm] te, English Language Foundation [primary sikul thlan bika zirlaite tana English bulṭhut zirna] te, Period Pride [hmeichhe zirlai naupangte zinga hmeichhe hun bi kaihhnawih hriselna leh thianghlimna (menstrual health & hygiene) atana hma lakna] leh Money Wise [sum hman leh enkawl dan inzirtirna (financial literacy)] te chu department leh agency hrang hrangte nen ṭang hova kalpui turin ruahman a ni a. He’ng hma lakna hrang hrang hi September ni 10, 2025 khian School Education Minister Dr Vanlalthlana hovin a hawnna hun hman tum niin, chumi atana inpuahchahna leh ruahmanna hrang hrangte chu he ṭhut khawmah hian thlir ho a ni.

Ruahman lawk dan chuan, September ni 10, 2025 (Nilaini) chawhma dar 10-ah Government Leitlangpui High School-a Cosmic Classroom chu Minister Dr Vanlalthlana chuan a hawng ang a. School Education Complex Conference Hall-ah hma lakna hrang hrang hawnna inkhawm buatsaih zui tur niin, he hunah hian Learning Bridges ‘QR Code’ hawnna leh bicycle semna hun te, Book Nest Initiative hawnna leh lehkhabu semna hun te, ELF, Period Pride leh Money Wise hawnna hun te hman a nih dawn bakah, Lungsen leh Tlabunga Cosmic Classroom chu Minister hian ral aṭangin (online-in) a hawng nghal bawk ang.