533/2025-2026

Lunglei, 2025 Ṭomir thla ni 22: Lunglei District Deputy Commissioner (Bawrhsap) hma laknaa Lungsen Aspirational Block huam chhunga nu leh naupangte hriselna leh chawi kanna kawnga beihpui thlakna tur, Project BLOOM (Beter Living through Outreach, Optimal Maternal & Child Health) kalpui dan tur chungchang chu nimin khan Lunglei Bawrhsap Pi Navneet Mann hovin a hna thawh pindanah sawi ho a ni.

NITI Aayog hnuaia Aspirational Block Programme-in hriselna leh chaw ṭha (health & nutrition) chungchanga hmasawnna tehfung atana thlan bik, key performance indicator (KPI) a duan hrang hrangah Lungsen Block-in hma a sawn theihna tur leh zaa za (100%) tihhlawhtlin a nih theihna atan Project BLOOM hi ruahman niin, raipuarte a hun taka chhinchhiah (register) an nih a, chaw ṭha (supplementary nutrition) pawh ṭha taka an dawn theih nan leh damdawi inah ngei nau an neih theih nan te, nausen leh naupangte'n an ṭhan lenna atana mamawh khawp chaw ṭha an hmuh a, an lo hrisel zel theih nan leh nu leh naupangte tana sawrkar ruahmanna hrang hrang awmte a chhawr turte'n an hriata an chhawr ngei theih nan te hma lak tum a ni.

Project BLOOM hi June thla tirah kalpui ṭan (launch) tura ruahman niin, a hawnna hi Primary Health Centre (PHC) Lungsenah buatsaih ni se, tih a ni a. He project hnuaiah hian Block Development Officer (BDO) Lungsen kaihhruaina hnuaiah Child Development Project Officer (CDPO) Lungsen leh Medical Officer (MO), PHC Lungsen te'n a tam thei ang ber campaign leh awareness kalpui turin ruahmanna lo siam se, tih a ni a. District Immunisation Officer (DIO), Lunglei chuan Lungsen Block chhunga hri danna (immunisation) pek dan tur ruahmanna siamin, hri danna pek kawngah leh hriselna chungchangah hmasawnna a awm zel theih nan hma lak ni se, tih a ni a. Raipuar an nau pai aṭanga thla thum chhunga inziak lut (register)-te hnena pek atan special gift basket chu he project pual hian buatsaih tum a ni bawk.