1070/2026-2027

Lunglei, 2026 Nikir thla ni 18: Vawiin khan tun fur ruah sur avanga Lunglei Theiriat T-Way Filling Station bula lei minin National Highway kawng a hnawh pin ṭhin avang leh a chhak Theiriat kawng chung kawng bal avanga inkal pawhna chungchanga harsatna thleng mek leh a chin fel dan tur sawi hovin Lunglei District Bawrhsap Pi Navneet Mann hovin a hna thawh pindanah Lunglei District Disaster Management Authority (DDMA) member-te, a kaihhnawih sawrkar official-te, NHIDCL leh BRN Infrastructures Pvt Ltd ai awhte, Theiriat Local Council leh Young Mizo Association (YMA) Sub-Headquarters Lunglei ai awhte an ṭhu khawm.

Bawrhsap Pi Navneet Mann chuan Theiriat T-Way Filling Station bula National Highway kawng laih avanga fur ruahtuiin lei min a siam ṭhin leh mipuite'n harsatna an tawk ṭhin chu pawi a tih thu sawiin, chhiatna lian tham zawk a thlen loh hram a beisei thu a sawi a. Tuna lei minna hmun chu kum hmasa lama a lo min tawhna leh lei min hlauhthawnawmna hmun a nih avangin District thuneitute leh DDMA aṭangin a venna hna chak zawka thawk turin BRNIPL lam an nawr reng thu te, NHIDCL Executive Director leh hotu sang zawkah te pawh lehkha an ziah thu leh anni pawhin an bawhzuipui thu te sawiin, an duh anga company lamin hna an thawk chak tawk lo chu pawi a tih thu a sawi a. Fur ruahtui a tlak ṭan tawh avangin leh chhim lam mipuite'n harsatna an tawh mek avangin harsatna chin fel dan ngaihtuah thuai a ṭul thu sawiin, tu mah indem leh inmawhpuh lovin, harsatna nasa zawk a thlen lohna tur leh a chin felna turin thawh ho leh ṭan rual a pawimawh thu a sawi.

He hunah hian Assistant Commissioner (Revenue) Pi Jennifer Vanlalhruaii Pachuau hnen aṭangin DC hova kawng laih leh siam ṭhat hna thawh kal mek endik leh chak zawka hna thawh a nih theih nana a hmuna tlawh leh lehkha ziak hmanga hma an lak dan hrang hrang ngaihthlak a ni a. YMA Sub-Headquarters Lunglei President Pu K. Lalfakzuala chuan Theiriat lei min vanga harsatna thleng a hmuna an tlawh a, an hmuh dan sawiin, Theiriat Local Council Chairman Pu S. Sanglura chuan an harsatna leh hma lakna hrang hrang a tar lang bawk a. PWD, P&E leh PHED hotute'n inkal pawhna kawng, eng pekna leh tui pekna chungchanga harsatna awm leh a chin fel nana mamawh leh rawtnate an tar lang bawk.

Theiriat T-Way Filling Station bul hi fur ruah sur avangin June ni 15, 2026 (Thawhṭanni) zan khan minin, lei min hian kawng a hnawh bakah lirthei tang a awm bawk a. Lei min thu hriat a nih rualin lirthei tang leh harsatna tawkte ṭanpui turin DDMA leh Police lamin hma la nghalin, Theiriat Local Council leh YMA leh mi tlawmngaite nen lirthei tang hi lak chhuah a nih hnuah kawng hi khar rih a ni a. June ni 16, 2026 (Thawhlehni) zingkarah kawng hi then faia tihtlang niin, ruah sur vangin tlai lamah ping lehin, zankhuaa khar ngaiin a awm leh a. Kawng hi then fai leh ni mah se, ruah a sur reng avangin leh a khat tawka lei tla a awm leh ṭhin avangin lirthei leh mihring veivak tan a him lo hle a; a helna kawng a awm loh avangin he lai pal tlang ngai lirthei leh mipuite'n harsatna an tawk nasa hle a ni.

PWD hotute chuan harsatna nasa zawk pumpelhna turin kawng chung PWD Approach Road chu siam ṭha tura hma an lak mek thu sawiin, Approach Road siam nan hian cheng nuai 25 dah a nih thu an sawi a. Vawiin lamah a kawng chhuat siam rem hna thawh ṭan a nih thu leh hmanraw mamawh lak khawm mek a nih thu sawiin, a kawng a chhukchhoh deuh avangin leh fur ruah tui a tlak tawh avangin PCC pavement-a siam chuan duhthu a sam dawn loh avangin alkatra luan (flexible pavement)-a siam tum a nih thu an sawi a. He lai kawng siam chungchangah hian mahni theihna zawn ṭheuhvah theih tawp chhuah ho ṭha tih niin, PWD, Local Council leh YMA te inrawn tlangin hma lak ni thei se, tih a ni a. PWD te'n kawng siamnaa an hman atan hian BRNIPL chuan GSB cubic metre 100 thawhin, truck 4 hmantir se, tih a ni.

BRNIPL lamin National Highway kawnga leivung chu a hma lamin paih fai se tih niin, leivung paihna hmun tur remchang chu Local Council lamin lo ngaihtuah se, tih a ni a. Lei min belh zel tur ven nan Theiriat Local Council leh YMA kutah DDMA aṭangin silpaulin leh chhawmdawlna sum pek ni se, tih a ni a. Police lamin he lai hmuna duty an dah ṭhin chu a ṭul anga dah chhunzawm zel ni se tih niin, he lai kawngah hian harsatna nasa zawk a thlen lohna turin DDMA aṭangin uluk taka vil leh en zui zel ni se, tih a ni.