1704/2024-2025

2024 Thlazing ni 23: Vawiin khan Lunglei District Bawrhsap Pu R. Lalṭhazuala hovin a office chamber-ah District Administration, Police, Young Mizo Association (YMA) leh Mizo Zirlai Pawl (MZP) aiawhte'n tun hnaia Borapansury-a Mizo police pahnihin Chakma mipui kut an tawrh avanga YMA leh MZP te'n Lunglei District chhunga Chakma pawn chhuah an khap leh Khawthlangtuipui Group huam chhunga Group YMA te hma lakna chungchangah boruak ṭha zawk a awm theih dan tur an sawi ho.

He hunah hian DC leh Additional DC te bakah, SP Lunglei, DIPRO Lunglei, Lunglei Sub-Headquarters YMA President leh Lunglei Headquarters MZP President te telin, Tlabung aṭangin SDO (Civil), SDPO Tlabung, Khawthlangtuipui Group YMA President leh Tlabung Sub-Headquarters MZP President te'n Google Meet hmangin meeting hi an zawm bawk a. Lunglei Bawrhsap Pu R. Lalṭhazuala chuan August ni 19, 2024-a Lawngtlai District-a Borapansury khuaa thil thleng chu vanduaithlak a tih thu sawiin, thil thlenna hi Lunglei District chhung ni lo mah se, hnam khawih thil a nih ang leh hemi boruak kal zelah Lunglei District-ah YMA leh MZP lam hma lakna a kal mek bawk avangin boruak duhawm lo zawk a thlen loh nan sawi ho ṭha tih a nih anga meeting koh a nih thu a sawi a. Inpawh tlang taka an ngaih dan sawi tlang turin meeting-a telte chu a sawm a ni.

He hunah hian Lunglei SP mawhphurhna la mektu Pu K. Beihmotaosa chuan police lam aṭanga hma lakna report pein, case ziah luh fel a nih tawh thu leh dan anga hma lak chhoh mek a nih thu a tar lang a. Tlabung SDO (Civil) leh Tlabung SDPO te'n an hma lakna report pe bawkin, Lunglei Sub-Headquarters YMA, Lunglei Headquarters MZP, Khawthlangtuipui Group YMA leh Tlabung Sub-Headquarters MZP President ṭheuh te'n Borapansury thil thleng an duh lohzia lantir nana hma an lak dan leh an dinna an sawi bawk.

Bawrhsap chuan Lunglei District chhunga Chakma pawn chhuah khapna lek kawh mektu Lunglei Headquarters MZP leh Khawthlangtuipui Group huam chhunga hma la mektu Group YMA te chu case ziah luh a nih tawh anga dan anga hma lakna kal chho zel tur a nih hre thiam a, boruak ṭha zawk a awm theih nan Chakma pawn chhuah an khapna leh an hrekna chu sut turin a ngen a. Lunglei Headquarters MZP leh Khawthlangtuipui Group YMA te chuan DC ngenna chu committee-ah an lo sawi zui tur thu leh tlai dar 4 hmaa an thu tlukna an hriattir theih tur thu an sawi a ni.