1705/2024-2025

Saitual the 23rd August, 2024: Vawiin chawhma dar 11:00 am khan September ni 5, 2024-a ‘Zirtirtute Ni’ hman dan tur relin Saitual District Level Committee on Celebration of Teachers’ Day 2024 chu an Chairman, District Bawrhsap Dr. Lalngura Tlau hoin DC Conference Hall, Saitualah an thu khawm.    

He hunah hian thutkhawm kaihruaitu Dr. Lalngura Tlau chuan member kalkhawmte hnenah lawmthu sawiin, zirtirtu hna pawimawhnate a sawi a. He “Zirtirtute Ni” hi zirtirtute chawimawina tur a ni tih sawiin, ngaih pawimawh a tul tih a sawi a, a hman dan tur rel tura kalkhawmte pawh ngaihdan zau taka sawi turin a sawm nghal a, he mi hnu hian rorel tan a ni. 

Saitual District Education Officer (DEO) Pu K. Lalnunfela, Member Secretary ni bawk hnen atangin nikum (2023) lama 'Zirtirtute Ni' hman dan report tawi ngaihthlak a ni a. Saitual District huam chhung atanga School hrang hrangin kum 2023-a National Teachers’ Welfare Fund (NTWF) Contribution an pek dan leh he fund atanga tanpui ngaite tanpuina an lo pek tawh dante a tarlang. Sawrkar leh mimal enkawl sikula zirtirtu zawng zawngte chu National Teachers’ Welfare Fund (NTWF) hnuaiah kum tin cheng 200 senga an inziah luh thin chu tarlangin, NTWF-a inziaklutte chu damlohna leh vanduaina an tawhin cheng 30,000 thlenga tanpui theih an nih thu a sawi bawk a ni.  

He thutkhawmnaah hian District Level-a ‘Zirtirtu Ni’ lawm dan tur sawiho nghal a ni a, School tin ten an remchan dan angin mahni school theuhah hman ni se tih rel a ni a, khawtlang anga lawm duhte tan pawh zau taka phalsak niin NGO hruaitute leh sawrkar official-te pawh tul an tih anga sawm theih turin zalenna pek an ni. Zirlai naupangte insengso zawnga lawm a nih loh nan a tul angin school tinah inkaihhruaina (instruction) hi pek tura rel a ni bawk.     

Teachers’ Day Banner hi Saitual leh Keifang-ah te tar ni se tih rel a ni a, District tihmingthatu zirtirtu chhuanawm National Awardee, State Awardee leh District Awardee-te thlalak pawh tarlan tel ni se tih a ni a, heng Awardee te hi “Zirtirtu Ni”-ah hian Bawrhsapin thingpui inpuiin chawimawina hlan nghal se tih rel a ni bawk.  

Vawiin thutkhawmah hian sawrkar official-te bakah Joint VC, YMA, MJA, leh District chhunga zirna lam kaihhnawih pawl hrang hrang aiawhte an tel a ni.