3114/2024-2025

2024 Sahmulphah thla ni 20: Vawiin khan Lunglei District Bawrhsap Pu R. Lalṭhazuala chuan Lunglei veng hrang hranga raltlante ei tur buhfai sem chhuah tur chu a pisa tual aṭangin a vai liam.

Lunglei Bawrhsap Pu R. Lalṭhazuala chuan raltlante ngaihven leh tuamhlawm kawnga veng hrang hranga hruaitu leh mi inpete hna thawh chu ropui a tih thu sawiin, buhfai leh thil dang ṭanpuina a dawng tur dik takin an dawn theih nan tlawmngaia theih tawp chhuahpui zel turin a ngen a. Raltlan enkawlna kawnga thawktu hrang hrang - Local/Village Council, YMA leh medical lam bakah, a ṭul apianga che chhuak ṭhin mi tlawmngai an awm ṭhin chu thlamuanthlak a tih thu a sawi bawk. 

Vawiin hian Lunglei Bawrhsap chuan raltlan ṭanpuina tur buhfai pik-up pathum leh 407 truck pakhat phur khat ṭheuh vai liamin, he'ng hi khawpui chhung veng pathum - Ramthar, Farm Veng leh Serkawna raltlan awm mekte pek tur a ni a. Mi pakhat tan kg 20 zela sem tum a ni.

Tun ṭum bikah hian Lunglei District tan buhfai kg 129.6 dawn niin, vawiina sem bakah hian a tahtawla sem chhunzawm tura ruahman a ni a. Hriat theih chinah tun dinhmunah Lunglei District khua leh veng hrang hrangah raltlan mi 1,829 awma chhinchhiah a ni.

Attachment

  • Loading attachment...