3113/2024-2025
2024 Sahmulphah thla ni 20: Vawiin chawhma khan Lungsen YMA Hall-ah Lunglei District Agricultural Marketing Committee (DAMC) huaihawtin Lungsen RD Block huam chhunga multipurpose society hrang hrang hruaitute tan Mizoram Bana Kaih ruahmanna hnuaia thlai thar (specified bik) hralh chhuah dan tur chungchang inhrilhfiahna (sensitisation) buatsaih a ni.
He hun hi Lunglei DAMC Member Secretary, District Agriculture Officer (DAO) Pu VL Hmangaihchhunga chuan kaihruaiin, Mizoram Agricultural Marketing Board (MAMB) Co-opted Member Pi C. Zochansangi chuan thlai thar hralh dan tur chungchang a sawi fiah a. Line department hrang hrang Horticulture Department; Land Resources, Soil & Water Conservation Department; Cooperation Department leh Agriculture Department aṭangin thu sawi ngaihthlak ni bawkin, Mizoram sawrkar ruahmanna hnuaia thlai thlan bik pali (4) - hmunphiah, sawhthing, hmarcha leh aieng te hralh chhuahna kawnga society mawhphurhna leh a kaihhnawih thil hrang hrangte zir ho a nih bakah, zawhna leh chhanna hun hman a ni bawk.
Sensitisation programme hi block hrang hrangah hman tura ruahman niin, naktuk khian Tlabungah buatsaih leh a ni ang.
Lunglei District chhungah hian sawhthing, aieng leh hmarcha ching khua leh veng hrang hrangah DAMC hriatpui multipurpose society 79 awmin, hmunphiah ching society 54 an awm bawk a. Lungsen RD Block hnuaiah hian sawhthing, aieng leh hmarcha ching society 11 awm mekin, hmunphiah ching society 7 an awm bawk a ni.
He'ng society dinna khaw tinah hian primary collection centre din vek niin, hmun ṭhenkhatah chuan Community Hall emaw, NREGA Hall emaw, VC House emaw hman ṭhin a ni a. He'ng primary collection centre hrang hrang aṭang te hian a leitu turte nena an indawrna tura ruahman, secondary collection centre-ah dah khawm leh ṭhin a ni a. Lunglei District chhungah chuan secondary collection centre hi hmun 4-ah ruahman niin, chhim lam kawt chhuah atan Hrangchalkawna Mizofed Collection Centre, hmar lam kawt chhuah atan Haulawnga Horticulture Collection Centre leh khawthlang lam kawt chhuah atan Thenhlum leh Tlabung Community Hall te hman a ni a. Hmunphiah bik atan Tlabung area hman a ni bawk.
Thlai thar bikah hian sawrkar rate siam anga hralh theihte hi hun bi neia hralh leh lei chhuah ṭhin a ni. Heti angin:
Sawhthing: January - May
Aieng: January - May
Hmarcha: January - March
Hmunphiah: 10th January - 10th March
