Vawiin khan Lunglei DC Conference Hall-ah Lunglei DC Pi K. Lalrinzuali kaihhruaiin Tripura Transit Camp-a Reang(Bru) awmte lak let hna kalpui tura hmalak tul hrang hrang leh inbuatsaihna te thlir hovin District Level Core Committee on Reang (Bru) Repatriation chu an thukhawm. Home Department Addl. Secretary Pi Lalbiaksangi, leh Pu David H. Lalthangliana, OSD Home Department-te he meeting ah hian an tel a ni.

Meeting kaihruaitu Lunglei DC Pi K. Lalrinzuali chuan nikum 2018-a Bru hruai kir (Repatriation) ah Bru chhungkaw 22-te Lunglei District ah hruai kir an nih thu sawiin tun dinhmunah Lunglei District-a rawn let tur chhungkaw 371 an la awm thu a sawi. Heng chhungkaw 371 te hi Lunglei District huam chhunga khaw pali- Putlungasih, Chawilung S, Dinthar leh Buknuam ah hruaikir an ni ang. Sawrkar officials-te leh Department mawhphurna neite uluk leh thahnem ngai taka hma la tura chahin Lunglei District chhunga khawtlang hruaitute leh tlawmngai pawlte thawhpuiah a sawm a ni.

Pi Lalbiaksangi, Additional Secretary, Home Department chuan nikum lama Sawrkar leh All NGO ten inremna thu an lo neih tawh angin Tripura Transit Camp-a Reang (Bru) awmte chu kumin October thla atang hian lak let hna thawh tum a nih thu sawiin kumin chhung ngeia zawhfel tum a nih thu a tarlang. Pi Lalbiaksangi chuan tun tuma Bru lak let tum hi a tawpna (Final Repatriation) a nih tur thu sawiin an list ennawn leh endikna 2nd Phase Identification neih thuai a nih tur thu a sawi. Bru laklet tur te chu an chhuahsan na ngei Assembly Constituency-ah dah let tur an nih thu sawiin mawhphurna nei official ten uluk taka kalpui turin a chah a ni.

Pu David H. Lalthangliana, OSD Home Department chuan Bru lak let tur hna kalpui tur hian Action Plan mumal tak duan mek a nih thu sawiin tun thla June ni 17 (Monday) hian Monitoring Committee on Bru Repatriation chu Aizawl ah an thutkhawm tur thu a sawi.

Vawiin meeting-ah hian Relief Camp atanga Lunglei District an rawn pan kawnga motor ruahman dan tur, an ei leh in tur, tui in tur, inthiarna leh Medical facilities leh security arrangement te chipchiar taka sawiho a ni a. Department hrang hrangte sum mawmawh te, kawng dinhmun, kawlphetha dinhmun, damdawi leh medical facility dang mamawh tur te, buhfai lama ruahmanna siam tur te leh Sawrkar official-te duty dan tur sawiho a ni bawk. Heng Bru chhungkua lo let te chenna tur House Site Plan mumal tak Revenue Department in an ruahman dawn bawk a ni.