Vawiin khan Department of Environment, Forests & Climate Change, Lunglei Forest Division buatsaihin Lunglei DC Conference Hall-ah New Economic Development Policy (NEDP) hnuaia hmalakna Çapacity Building and Training on Climate Change neih a ni. He ni khat awh training hi Lunglei DC Dr Ankita Chakravarty, IAS in a hawng. He training-ah hian Lunglei khawpui chhunga sawrkar Department hrang hrang leh zirna in hotute, chanchinbumite, khawtlang hruaitute leh tlawmngai pawl aiawh mi thahnem tak an tel a ni.

Lunglei DC Dr Ankita Chakravarty chuan kalkhawmte lawmna thu sawiin ramngaw leh nungchate humhalhna kawngah mitin ten mawhphurna kan nei theuh a, hemi lam kawnga mipuite an harhchhuah theihna tur leh chak zawka hmalak a nih theih nan sawrkarin theih tawpin tan a la chhunzawm zel dawn a ni, a ti. Hemi kawnga hmalakna ah tlawmngai pawl hrang hrang leh khawtlang hruaitute nen thawhho na tha tak an nei chu lawmawm a tih thu a tarlang bawk.  Training tura kalkhawmte chu thiam tak tak tumna rilru nen ngun taka ngaithla tura chahin anmahni awmna veng leh an thawhna theuhah nungcha leh ramngaw te humhalh kawnga midangte zirtirtu ni theuh turin a chah a ni. 

Hemi hnuah hian Technical Session neih zui niin Dr. C. Vidhyasagar, IFS, DFO Lunglei chuan Climate Change Mitigation and Adaptation Initiatives in Mizoram tih thupui hmangin zirtirna a pe a. Mizoram chu nungcha hausakna neihna hmun ni mahse mipuiten kan ramngaw leh nungcha te humhalh tha tawk lovin kan ti chereu a, kan ram boruak sik leh sa pawh nasa takin a in thlak danglam chho mek a ni tiin nungcha leh ramngaw te humhalh kawngah nasa leh zuala tan kan lak a tul takzet a ni, a ti a. Kan nungcha leh ramngaw te humhalh kawngah Mizoram sawrkarin nasa takin hma a la mek a, State Action Plan on Climate Change duang chhuah a nih tawh bakah Mizoram sawrkar hmalakna pawimawh tak New Economic Development Policy (NEDP) kaltlangin EF&CC leh UD&PA Department ten thahnemngai takin hma an la mek a ni, a ti.

Pu James Lalnunzira Hrahsel, Project Scientist, Mizoram Science & Technology Innovation Council leh Pu Lalthanpuia, Project Scientist, Mizoram Science & Technology Innovation Council te pawhin thupui thlanchhuah bik hmangin zirtirna an pe bawk.  Pu C. Lalthankima, MFS, Assistant Conservator of Forests chuan lawmthu sawiin hun a khar a ni.