Vawiin khan Mizoram Assembly Speaker Pu Hiphei chuan Mara Students’ Boy’s Hostel, Zotlang ah hawnna hun a hmang a, khuallian a ni bawk a ni. Minister Pu C.Ngunlianchunga pawhin he hun hi a hmanpui.

Khuallian Pu Hiphei chuan zirlaite tana hmasawnna tur leh rahbi thar an kaina tura Hostel building lian tha tak nei tura hma la tute chungah lawmthu  a sawi a. Mithiam zingah aiin mi taima zingah hlawhtlinna a tam, a ti a. Civil Service, Medical, Technical leh University lamah te zirlaite chu inzar pharh nasa turin a fuih bawk a. Ram hmasawnna leh changkanna tam tak karah hian hnam tawng thiam chu pawimawh a tih thu sawiin, pi leh pute rohlu khawm zelin, tang sauh sauh turin kalkhawmte a ngen a ni.

Minister Pu C.Ngunlianchunga chuan thusawiin inkhuahkhirhna hnuaiah zirlaiten rah tha tak an chhuah chu Sawrkar pawhin a beisei a, Sawrkar hmathlir thui tak ti hlawhtling turin leh zirlai nu leh pa te pawhin an fate fuih sauh sauh a, ram darthlalang ni thei tura tan la turin a ngen a ni.

Pu N.Zakhai, CEM, MADC pawhin thusawiin Mara Students’ Boy’s Hostel hlutna, mawina, thianghlimna leh zahawmna vawngtu leh thiamna, finna umzuitu ni turin zirlai te a chah a ni.

Mara Students’ Boy’s Hostel sak nan hian Non-Lapsable Central Pool Resources Fund (NLCPR) atanga sum hmuh a ni a, Nuai Rs. 269.18 senga sak niin, ni 17.7.2014 atangin sak tan a ni a, ni 31.5.3018 khan sak zawh a ni. Contractor Beiparysalai, Siaha sak niin, RCC Type IV Storey a sak a ni. Basement I, Basement II, Ground Floor leh First Floor awmin a vaia a zau zawng hi 1,174.21 Sq.m. a ni a, Choka leh Dining Hall a awm a, khum 60 dah theihna niin, inbualna pali leh inthiarna pali chhawng tinah hian a awm a ni. Chowkidar pakhat leh Cook pakhatin tun dinhmunah chuan a enkawl ang a, Warden atan Mara House LO leh Assistant LO te ruat hrih an ni.

Ni 1.6.2018 atangin Admission hawn a ni a, Admission Form Rs.10, Admission Fee Rs. 500, Mess Fee Rs. 1600 leh Security Deposit Rs.500 te angai a ni.

He hun hi Pu K.Chhuabei, Executive Member, PWD, MADC chuan a kaihruai a. Mara House LO leh hnathawkte leh zirlai leh zirlai nu leh pa leh midangte thahnem tak an tel a ni.