Thilnung chi tinrengte humhalha venhim an nih theihna turin United Nations Convention on Biological Diversity (CBD) chu kum 1992 khan Brazil khawpui Rio de Janeiro-a Earth Summit-ah khan din a lo ni tawh a. Hemi denchhen hian kum tin May ni 22 hi ‘International Day for Biological Diversity’ atan United Nations chuan a lo puang ta a ni. Kum tin thupui thlan bik neih a ni thin a, kuminah pawh he Day kum 25-na a nih angin ‘Celebrating 25 years of Action for Biodiversity’ tih hi thupui atan thlan a ni.

Kumin 2018-ah hian he International Biological Diversity Day hi state tin ten anmahni remchan dan anga hmang turin National Biodiveristy Authority, Chennai chuan a hriattir a. Mizoram-ah pawh he Ni puala inkhawm pui ber chu Art & Culture Auditorium, Berawtlang, Aizawl-ah buatsaih niin Mizoram Chief Minister leh Chairman, Mizoram State Biodiversity Board ni bawk Pu Lal Thanhawla chu Khuallian niin a hmanpui.

International Day for Biological Diversity 2018 lawmna inkhawm Principal Secretary& PCCF, Environment, Forest & Climate Change Pu Lalram Thanga kaihhruaiah Khuallian Pu Lal Thanhawla chuan Mizo Kristiante chu thilsiam zawng zawng hnenah chanchintha hril tur kan nih avangin nungcha, thing leh mau humhalh kawngah tun aia nasa lehzuala tanlak a ngai a ni, a ti. Mizorama nungcha, thing leh ramhmul damdawi chi tam takte chu a chhunga chengten kan hmelhriat hmain a lo rem tawh hial a rin thu sawiin Chief Minister chuan tunah chuan sorkar leh khawtlangte tangrualin zokhua zawka nungcha, thing leh mau leh ramhmul damdawi te humhalhna kawngah mite hrilhhriat leh venhim hna thawh mek a ni, a ti bawk. Hemi kawngah hian Mizote chu thangharh tlai deuh mahse tun atanga kan ram mawina leh hausaknate dimdawi leh humhalh kan thiam phawt chuan khawvela nungcha leh thing leh mauah biodiversity  tamna ber hmunte zingah kan la tel pha a ni tiin Pu Lal Thanhawla chuan tun hnuah Mizotem silai aiin camera nen sava leh nungchate veh an ching tan ta chu lawmawm a tih hle thu a sawi a; mimal leh pawl zingah Zotheihuan siam an pung zel pawh a lawmawm hle a ni, a ti. Ram leh hnam tana mi tangkai nihna kawng tha tak chu nungcha leh thing leh mau humhalh kawngah mimal leh pawl anga theihtawp chhuah hi a ni tiin kalkhawmte a fuih. Khuallian hian Mizoram State Biodiversity Board leh Catalyst Solutions, Chaltlang te buatsaih ‘Operational Tour Trip’ leh ‘Operational Guidelines for BMC’ te a tlangzarh nghal a ni.

25th Biodiversity Day inkhawmah hian Prof. Lalnundanga, Dept. of Forestry, MZU in ‘Floral diversity, Management & Conservation’ tih thupui a sawizau a; Dr.Lalneihpuia Chhakchhuak, Technisal Asst., Mizoram State Biodiversity Board-in kumin IDB 2018 Theme ‘25 Years of Action on Biodiversity’ chungchang a sawi bawk. Prof.H.Lalramnghinglova, Gen Secy. MEFCOF-in Zotheihuan hmalakna leh hlawhtlinna chungchang thu a sawi bakah IDB 2018 puala Photography Competition-a lawmmawn dawngtute hnenah PCCF Pu Lalram Thanga’n lawmman a sem nghal bawk. 

Mizoram Biodiversity Board-ah hian EF&CC Minister chu Chairman a ni a, Chief Wildlife Warden, EF&CC Dept. chu Member Secretary niin, Expert Member 5 an awm bakah ex-officio member 5 an awm bawk. Mizoram Biodiervsity Board kaihhruaina hnuaiah hian hmalakna kawng hrang htang neih a ni a, chungte chu :

1). Mizoram chhung thingtlang khaw hrang hrangah Biodiversity Management Committee (BMC) din a ni a, tunah hian Mizoram pumpuiah BMC 250 an awm mek a. Heng BMC hnuaih hian People’s Biodiversity Register (PBR) siam a ni a, tunah hian PBR 5 (Pamchung, Thenhlum, Pangzawl, Laki leh MZU) siam zawh tawh a ni. Kumin chhung hian Block leh Village level PBR-te buatsaih tura hmalak mek a ni bawk.

2). PBR documentation atan hian district tinah Technical Support Group (TSG) din a ni a, hetah hian Forest Dept. bakah Dept danga mite, NGO/prominent citizen emaw helam kawnga tui mite chu a tul anga BMC te puibawm turin ruat an ni.

3). Mizoram State Biodiversity Board hian biodiversity humhalhna kawngah hma a la mek a, Zoram mipuite hnenah a theih anga tam zirtirna pek mek bawk a ni.