Saiha DSWO huam chhung - Sangau, Tuipang, S.Bungtlang, Saiha, Chawngte leh Saiha Block-a National Social Assistance Programme(NSAP) hnuaia pension la ten harsatna an tawh mek chungchangah Social Welfare Department chuan hetiang hian thuchhuah a siam. 

Kum 2017 hmalam ah tar pension, hmeithai pension leh rualbanlo pension chu Autonomous District Council hnuaia awm an nih chuan anmahni District Council theuhah sum transfer thin a ni a, sum faiin an la thin. Sawrkar laipuiin Direct Benefit Transfer hmanga pension pe tura a phut tak avang leh nawrna a nasat avangin beneficiaries-te account hawnga report tura tih an ni a. Beneficiaries ten an account an report hnuah March 2017 thlenga  an pension thunsak tan a ni ta a. Tha takin an dawng turah Department-in a ngaih laiin thenkhat ten an account-a a luh ve loh thu te, a then chu a thuah-a a luh thu te dawn a ni ta a. Beneficiaries thenkhat mahni account nilo report an awm bawk a. Department-in a chhui chian hnuah chutiang harsatna chu a lo tam hle tih a hmuhchhuah avangin a hnua pension an dawn tur pawh account lut diklo chinfel a nih hma chuan a thun ngam ta lo a ni.

He harsatna chingfel tur hian nasa takin Bank-te nen tangrualin Department chuan hma a la nghal a. An pension lak tur March 2018 thlenga an la lak loh zawng zawng hi hemi chinfel a nih veleh thunsak tum a ni. Power supply a that loh avang leh internet-te a that tawk loh avangin hma lak chak mahse a rang thei ang bera chinfel thuai tumin Social Welfare Department chuan tan a la a. Pension la te dawhthei taka ngaichang tur leh hrethiam turin Department chuan a ngen a ni.