Vawiin khan Aizawl lehThenzawl inkar kawng atanga Thiak Khua panna kawng siam thar hawnna hun hman a ni a, Minister Pu K.S.Thanga chu Khuallian niin PWD Hmuifang Division hotute, Thiak khawtlang hruaitute leh mipuiten he hun hi an hmanpui.

Minister Pu K.S.Thanga chuan taimakna leh rinawmna nen a hna thawh chuan hlawhtlinna a awm thin, a ti a, Thiak kawng siam hna thawhna kawngah Contractor, PWD hnathawkte leh Khawtlang mipuite tanrualna leh inpekna avangin he kawng thar hi a hun takah thataka peihfel a ni, a ti. Pu K.S.Thanga chuan neitu nihna pu chunga kawng thar chu enkawl turin a chah a, Thiak khawtlang tana hmasawnna a nih ngeina turin leh tangkai taka an hman atan duhsakna a hlan nghal bawk.

Kawng hawnna Inkhawm hi Thiak Community Hall ah hman a ni a, Er.R.Zirsangliana, E.E PWD Hmuifang Division hnen atangin Technical report ngaihthlak niin Thiak VCP leh NGO hrang hrangten lawmthu sawina hun an hmanga, zaithiam zaite ngaihthlak a ni bawk.

Thiak panna kawng siam thar hi Km 2.630 a thui niin Cell Filled Concrete a siam a ni a, RCC Hume pipe culvert 5 awm in kawng tluan hian Unlined Side Drain siam a ni bawk a ni. Kawng hi December 24, 2017 a siam tan niin March 27, 2018 ah zawh fel a ni a, cheng Nuai 202.88 senga siam a ni.