Nimin khan FCS&CA Minister Pu John Rotluangliana chuan Gas (LPG) leh tui alhthei (POL) chungchangah Mizoram dinhmun sawipuiin IOC hotute nen an thukhawm.

Thutkhawm ah hian Minister chuan LPG bikah Mizoram tan Distributor an tlem thu a tarlang a, a bikin Aizawl khawpui ah chuan Distributor 12 chauh an awm a hei hian mipuite mamawh a phuhru zolo ani tiin IOC hotute chu Distributor tamzawk an awm theihnan hma la turin a hrilh a. IOC hotute chuan Minister thusawi chu an bawhzui tur thu sawiin tun dinhmunah pawh Durtlang ah LPG Distributor tur chu dan angin an thlan tawh thu leh physical/site verification an neih mek thu an sawi a, Sialsuk ah chuan Godown tur sak zawh a nih tep tawh thu tarlangin Bairabi leh Kawlbem ah pawh kut thlak tan theih tep anih thu an sawi bawk a, Lawngtlai a Distributor thlanna tur Advertisement chu an tichhuah tep tawh thu an tarlang bawk ani. IOC hotute chuan MIzorama LPG Supply hnianghnar zawka a awm theih nan tan an lak thu sawiin nimin May ni 22 khan Borkhola atangin LPG phur Truck Trip 13 leh Mualkhang atangin Truck Trip 11 Mizoram tan thawnchhuah a nih thu an tarlang a ni.

Hemi bakah hian tui alhthei (POL) chungchang sawiho bawk a ni a, Minister chuan Mizoram ah Oil Depot kan neiloh thu tarlangin Retail Outlet chauh a awm avangin POL chu ni 2 emaw ni 3 lek daih anih thu a sawi a chhan hrang hrang avanga ni 2 emaw ni 3 vel Mizorama POL phurluh a niloh chuan mipuiten harsatna an tawh thin thu tarlangin Mizoram chhungah ngei Oil Depot siam a nih theihnan hma la turin IOC hotute chu a hrilh a. Minister chuan Oil Depot siam nana ram zau zawng km 1  bial (1km square) an mamawh chu a hriatpui thu sawiin Oil Depot siam a nih ngei theihnan ram chungchangah pawh tan a lakpui tur thu a sawi a ni.

Thutkhawm ah hian FCS&CA Minister bakah Pi Saizikpuii, Dy Resident Commissioner Mizoram House Silchar; Pu Alok Dutta, Chief Divisional Retail Sales Manager; Pu N N Singh, Chief Manager LPG; Pu Suman Biswas Asst Manager Retail Sales; Pu Martin Gangte, Sales Officer LPG Sales leh FCS&CA Official an tel a ni.