276/2023-2024

Lunglei the 1st May, 2023 – Lunglei Police, I&PR Department leh Higher and Technical Institute, Mizoram (HATIM) te tangkawp buatsaihin vawiin chawhnu khan HATIM Campus, Pukpuiah zirlaite tan Career Awareness Program neih a ni.

Vawiin program ah hian Pu Rahul Alwal, Superintendent of Police, Lunglei chuan ‘Career in the Civil Services’ tih thupui hmangin zirtirna a pe a, Pu Rishi Singh, IPS (Probationer) chuan UPSC Exam hmachhawn tura inpuahchah dan hrang hrang zirtirna pe in, Pi C. Lalremruati, DIPRO Lunglei chuan Financial Awareness & Planning chungchangah zirtirna a pe bawk a mi. UPSC Exam a Preliminary leh Main Exam-a inpuahchah dan tur te, lehkhabu pawimawhte, subject pawimawhte, coaching kalna tha te, Optional subject thlan dan te chipchiar taka zirho a ni.

Pu Rahul Alwal, SP Lunglei chuan Mizo thalaite chu UPSC Exam paltlang turin theihna leh thiamna tam tak nei nia a hmuh thu sawiin zirlaite chu taima taka inpuahchah turin a chah a. UPSC Exam-a hlawhtling turin inpuahchahna hun a duh rei thu leh amah ngei pawhin vawi engemawzat a beih thu sawiin zirlaite chu a vawi khatnaah an hlawhtling lo anih pawhin beidawng mai lova tumruh taka bei chhunzawm turin a chah a ni.

Career Awareness Program hi Lunglei District huamchhunga zirna in hrang hrangah neih chhunzawm zel tum a ni.