277/2023-2024
Champhai, the 1st May, 2023: Tunhnaiah Ngur khua, Champhai District-ah vawk dam lo engemawzat awmin, engemawzat an thi tawh bawk a. Vawk thi/damlo thisen hi hmunpui lama endik tura thawn mek a ni.
He Vawk natna hri hi a darh zel lohna turin Champhai District Magistrate Pu James Lalrinchhana chuan Sec. 144 CrPC, 1973 (Act II of 1973) in thuneihna a pek angin Ngur khua, Champhai District atangin vawk/vawk sa leh vawk sa atanga siam reng reng hralh chhuah/thawn chhuah/lak luh khap tlat a nih thu vawiin khan a chhuah.
Thupek zawm lo chu Dan hmanga hrem an ni ang. He thupek hian sut a nih loh chuan chhuah a nih atanga thla hnih (2) chhung a huam dawn a ni.
