278/2023-2024

Aizawl, 1st May 2023: Vawiin khan Health Minister Dr. R. Lalthangliana chuan Aizawl Civil Hospital-ah Mizoram Journalist Association member-te tana buatsaih Free Health Check-up chu khuallian niin a hawng a. He hunah hian Health & Family Board Vice Chairman Dr. ZR Thiamsanga chuan khualzahawm niin a hmanpui bawk.

Hawnna inkhawm Doctors’ Seminar Hall-a neihah hian thusawiin Dr. R. Lalthangliana chuan Aizawl Civil Hospital chu khawpui hmun laili taka awm, damdawiin pawimawh tak a ni, a ti a. Damdawiin chu a hlui tawh avangin chei that tuma hmalak mek anih thu sawiin, MJA member-te chu free health check-up ngaipawimawh turin a ngen a. Mizoram sawrkarin chanchinbumi te hamthatna a ngaihtuah zel tur thu a sawi bawk a ni.

Health Minister hian ZMC zirlai ten vawiin atanga internship an tan thu a sawi a, Medical College din tura sawrkar hmasa hmalaknaah lawmthu sawiin, tun sawrkar hnuaia ZMC hmasawnna hrang hrang te a tarlang nghal a. Aizawl Civil Hospital-ah ICU khum 10 dah belh a nih tawh thu leh khum 10 dang dah belh leh tura ruahmanna a awm thu a sawi a. Cardiology leh Oncology Department-ah te Super Specialist Doctor lak thar an nih thu leh mamawh phuhruk lailawk nan CSR kaltlangin Doctor, Nurse leh Lab Technician te chu NEIGRIHMS ah training tir an nih tur thu a sawi bawk a ni. Civil Hospital Gate bula Trauma Center sak mek chungchangah Health Minister chuan a rang lama sak zawh tum a nih thu leh a tul anga Department hrang hrang te khungleng thei tura ruahman a nih tur thu a sawi bawk.

Health Care Scheme sum indaihlohna chu a ngaihpawimawh thu sawiin Minister chuan sum indaihlohna phuhruk nan a Asian Development Bank atanga sawrkarin sum a puk tur cheng vaibelchhe 1000 chu July/ August thla velah hian hmuh theih beisei a ni, a ti a. Beisei anga thil a kal chuan September thla ah chuan Healthcare Bill tang mek te chu pek tlak vek hman a nih loh pawhin, a zualpui tal chu inpek theih tum a nih thu a sawi bawk a ni.

Dr ZR Thiamsanga , Vice Chairman H&FW Board pawhin thusawiin  Journalist-te chu ram kaihhruaina leh mipui khalhngilna kawngah mawhphurhna pawimawh tak an chang a ni, a ti a. Mipui vantlang zirtir kawnga Journalist-te hnathawh chu ropui a tih thu sawiin Dr. ZR Thiamsanga chuan hriselna inzirtirna kawngah pawh mipui zirtir uar zel turin Journalist-te chu a ngen nghal a. MJA-te  tana hetiang ang hun tha an siam thin chu Health Minister Dr. R. Lalthangliana leh a thawhpui te chungah lawmthu a sawi bawk. Hun khirh leh sawiselna tam tak karah Mizoram sawrkar chuan hna nasa takin a thawk a ni a ti a; NITI Aayog-in hriselna tehkhawng a siamah India state te (small state) zingah Mizoram chuan kum hnih chhung a zawnin pakhatna a hauh thu leh  Mizoram chu nau piang sangkhat zela boral  ( Infant Mortality Rate) tlem ber a nih thu a sawi bawk a ni.