3943/2023-2024

LUNGLEI; the 23^rd February, 2024: Vawiin chawhnu dar 1:00 khan DC conference Hall-ah March ni 1 a Chapchar Kût hman dan tur relna  meeting hnuhnung ber neih a ni a. Meeting  hi Chapchar kût-2024 Organizing Committee chairman Pu Donny Lalruatsanga’n a kaihruai a ni.

Vawiin meeting-ah hian Chapchar Kût lawmna  tura inpuahchahna hrang hrang te sawi ho niin,hmalak tawhna leh hmachhawp la awm te leh Estimated Expenditure te ngunthluk taka thlirho a ni.Kumin Chapchar Kût thupuiah “ Zo nun ze mawi tlawmngaihna”  hman a ni a. C.Thuamluaia Mualah chawhma dar 10:30 atanga hman tan tur a ni ang. Kût Nu atan Pi Lalrinpuii, Hon’ble Minister for Health & Family Welfare,etc. sawm a ni a, Kût thlengtu chu Pi Ramdinliani IAS, Deputy Commissioner, Lunglei district a ni ang.

Chapchar Kût lawmna-ah hian MUP ten Hlado(tlângtlir) chhamin, MHIP Sub-Hqrs. leh YMA Branch hrang hrang ten Hnam lam chi hrang hrang: Sarlamkai, Cheraw kan, Chawnglaizawn,Chheih lam, khual lam, Siktui thiang lam,etc.entir a nih dawn bakah, Special item te pawh entir a ni ang. Zaithiam mi 14 leh YMA Sub-Hqrs zaipawl ten zaiin mipui an awi ang. Chapchar Kût Hrâite leh Chapchar Kût Miss thlan a ni bawk ang. Chapchar Kût-2024 lawmna C.Thuamluaia Muala neih turah  hian  stall te siamin, ei tur leh thil dang dang hralhchhuah a ni bawk ang a, Photo Booth leh Photo Gallery te pawh siam a ni ang.