4172/2025-2026

Lunglei, 2026 Pawlkut thla ni 27: Vawiin khan Lungleia Chapchar Kut 2026 hman dan tur relin Lunglei District Level Chapchar Kut Celebration Committee chu Lunglei District Bawrhsap Pi Navneet Mann hovin Lunglei DC Conference Hall-ah an ṭhu khawm.

He ṭhut khawmah hian Lungleia sawrkar department hrang hrang official-te; Lunglei Sub-Headquarters Young Mizo Association (YMA), Mizo Hmeichhe Insuihkhawm Pawl (MHIP), Mizo Cultural Organisation (MCO) leh Mizo Cultural Artistes' Association (MCAA) te; Lunglei Headquarters Mizo Upa Pawl (MUP) leh Mizo Zaimi Inzawmkhawm (MZI) te; Lunglei District Headquarters Music Domain Mizoram (MDM) leh Mizoram Journalists' Association (MJA) ai awhte an tel a. Chapchar Kut 2026 hmanna tura thil ṭul hrang hrangte sawi ho niin, hlung taka hman a nih theih nan ruahmanna siam a ni a. Chapchar Kut hmanna tur thil ṭul hrang hrang lo bawhzui turin Organising Committee din a ni a. Chairman-ah Additional Deputy Commissioner, Co-Chairman-ah Sub-Headquarters YMA President, Finance Manager-ah Sub-Divisional Officer (Sadar), Secretary-ah Sub-Headquarters YMA Secretary leh Assistant Secretary-ah District Information & Public Relations Officer te ruat niin, official leh tlawmngai pawl ai awhte member-ah ruat an ni bawk.

Kumin Chapchar Kut hi "Zo nun ze mawi - Inremna" tih thupui hmangin March ni 13, 2025 (Zirtawpni) hian Lungleia C. Ṭhuamluaia Mualah hman tura ruahman a ni a. Lunglei District chhung leh pawn lam aṭanga zaithiam sawm tur lo thlithlai a, lo rawt turin Sub-Headquarters YMA kutah mawhphurhna dah a ni a. Kut Thlengtu, Kut Pa, hun hman dan tur chipchiar leh thil ṭul dang ruahman chu Organising Committee kutah dah a ni.

Chapchar Kut ni hian hnam lam chi hrang hrang thlir tur leh zaithiamte zai ngaihthlak tur a awm dawn a. Hnam ziarang tar lang leh chawi lar tur zawnga hun hman leh tum niin, sawrkar department, pawl leh mimal te tan an hma lakna pho chhuahna leh thil zawrhna tur bekte (stall) zar tum a ni bawk a. Hlung taka Kut hman a nih theih nan District Level Chapchar Kut Celebration Committee chuan District mipuite thawhpuina leh ṭawiawmna a ngen a ni.