4173/2025-2026

Lunglei, 2026 Pawlkut thla ni 27: Lunglei Municipal Council (LMC) ruahmannaa 'Lunglei Ni' hman tur atana Organising Committee chu vawiin khan Lunglei Convention Centre-a LMC BoC Meeting Hall-ah a ṭum nga nan an ṭhu khawm.

Organising Committee ṭhut khawm hi Chairman, LMC Chief Executive Officer (CEO) Pu Lalhmansanga'n a kaihruai a. Co-chairman, Lunglei Sub-Headquarters YMA President Pu K. Lalfakzuala; Secretary, Sub-Headquarters YMA Secretary Pu Zothanzuala Hnamte leh Assistant Secretary Pu H. Lalhmingthanga te bakah, member-te — sawrkar official, pawl hrang hrang ai awh leh Lungleia mi challangte an tel.

Lunglei Ni 2026 hi March ni 4, 2026 (Nilaini) chhun lamah hman tum niin, a hmun atan C. Ṭhuamluaia Mual chu ruahman leh hauh fel tawh a ni a. Organising Committee ṭhut khawmah hian Programme Committee leh Event/Activities Committee Joint meeting-in hun hman dan tur ruahmanna an duan te, Refreshment Committee, Light & Sound Committee, Ushering & Reception Committee leh committee peng dang aṭanga thu lutte thlir ho a ni a. Hnam lam entir tura sawm tur atan YMA branch & troupe 6 rawt niin, Photo Exhibition buatsaih ni se, a buaipui turin Lunglei Photographers Association (LPA) te ngen ni se, tih a ni a. Lunglei Ni hmannaah hian LMC huam chhunga YMA branch hrang hrang telna "Zaipawlpui" awm se ṭha tih niin, hla sak tur atan Pu Roliana Ralte hla phuah, "Leitlangpui Ka Vangkhua" tih chu thlan a ni a. Khuallian atan Mizoram Chief Minister beisei leh sawm ni se tih niin, Organising Committee ṭhut khawm leh hun atan February ni 3, 2026 (Thawhlehni) ruat nghal a ni bawk.