Mizo te’n Kut kan neih zinga ropui ber Chapchar Kut chu Mizoram hmun danga an lawm rualin Lungleiah pawh vawiin khan Thuamluaia Mualah ropui taka hman a ni a. Lunglei DC Pu K. Lalrohlua chu Kut Thlengtu niin, Lunglei HPC Vice Chairman Pu S. Laldingliana chu Kut Pa a ni.
Kut Pa Pu S. Laldingliana chuan Chapchar Kut phur taka kum tin kan hmang thin hian khawvel hmuhah pawh Mizote langsar takin min pho lang a ti a, khawvel mit hmuha mawi taka Mizote min par tirtu hmanrua-ah he Kut hi sawrkar pawhin tangkai takin a hmang a ni, a ti. Zohnahthlak hnam hrang hrangte kan cheng za a mahse kan zavaia min phuarkhawmtu chu Mizo kan nihna hi a ni, a ti a. He Kut avang hian hnam hrang hrang inkarah in unauna tha a piang mek zel bawk a ni, a ti. Kumin Chapchar Kut thupui ‘Aia upate zah’ chu Mizo nun ze mawi kan neih tam tak te zinga duhawm ber pakhat a ni tiin, a chhuanawm in, a chhawm nun zel tlak a ni, a ti a. He Zonun ze mawi tak hi thangthar ten a taka kan nunpui leh theih nan tan lak thar pawh a tul hle a ni, a ti. Thinlung hmun khat pua hmalam pana ke pen tlang tura sawmin, Mizo nun ze mawi lan chhuah tirna Ni atan mipui duhsakna a hlan nghal a ni.
Kut Thlengtu Pu K. Lalrohlua pawhin Mizote kan changkang chho zel anga kan culture hi kan ngai hlu tulh tulh dawn a ni, a ti a. He Kut hi sawrkarin a ngaipawimawhin chawlh pawh a puang a, chuvangin heng hunah hian i tel loh chuan Leitlangpuiah kan kimlo a ni tih hre thar leh ang u, a ti a. Kan hmel a mawi in Mizo nih a nuam a, chutiang bawkin kan Zonun ze mawi pawh i vawng nung zel ang u, a ti. Sawrkar hna kan thawk emaw vantlang tan kan thawk emaw, mahni mawhphurhna theuh ti hlawhlting ila a ti a. Lunglei tana kan thawh hian Zoram tana thawk kan nimai a ni tih hre thar leh ang u, a ti bawk.
Chapchar Kut lawmna programme hi Organising Co-Chairman Pu R. Lalnunthara, President, YMA Sub-Headquarters chuan a kaihruai a. Pu K. Lalfakzuala Secretary, Organising Committee leh General Secretary, YMA Sub-Headquarters ni bawk chuan report pekna leh lawmthu sawina hun a nei a ve thung a ni.
He Kut-ah hian Mizo hnam ziarang pholang thei hnam lam chi hrang hrang te entir an ni a. Zaithiamte leh branch hrang hrang atanga zaipawl te’n mipui kalkhawm te an awi a ni. MJA Lunglei Sub-Hqrs ten Chapchar Kut Miss 2017 atan Vanlalnunpuii, Electric Veng an thlang bawk a ni.
