Vawiin khan Champhai Kahrawt Field-ah Sub-Hqrs. YMA Champhai kaihhruaina-in Chapchar Kut ropui taka lawm a ni a, Champhai DC Pu Vanlalngaihsaka IAS chu Kut Thlengtu niin, Tuichang Bialtu MLA Pu Lalrinliana Sailo chu Kut Pa a ni.
Chapchar Kut Thlengtu, Champhai Bawrhsap ni bawk Pu Vanlalngaihsaka, IAS chuan Pu Lalrinliana Sailo, MLA in a hun hlu tak senga Champhai a Chapchar Kut a hmanpui thei chu lawmawm a tih thu sawiin, Chapchar Kut denchhen a kumin Vau Thla Ni 1 leh 2 chhung Mizo silhfen inbel tura tih chu Champhai District chhungah zawm a hlawh avangin lawmthu a sawi bawk. Chapchar Kut 2017 thupui 'Aia upa zah' chu Mizote pianken leh hnam rohlu anih anga chhawm nung zel turin mipuite a sawm a ni.
Kut Pa Pu Lalrinliana Sailo chuan Mizo khawpui, vawiin thlenga hnam dang sumdawngtu awm ve lohna, Champhai hmun a Chapchar Kut Pa a ni thei chu lawmawm a tih thu sawiin, Mualcheng khaw roreltu Sailo lal ropui, kum 1880 a kum 100 ni a boral ta, Lal Vuttaia puan thulkhung ngei sin chunga Kut Pa a ni thei chu vannei a in tih thu a sawi bawk.
Kut Pa chuan Mizote chu kan thlahtute atangin tlawmngaihna leh Aia upa-te zahthiam hnam kan nih vangin, kan nitin khawsak phung min chhawk zangkhai a, vawiin ni thlengin hnam dangte entawn kan nih bakah Aia upa zah hi ringtu nun nena kalkawp leh thil inhmeh tak a anih thu a sawi a. Aia upa zah hi chhungtin atanga bul tan chi anih thu leh inzirtirna dawngthalo chhungkua atanga chawr chhuakten Aia upa zahna, tlawmngaihna leh hawihhawmna an tlakchham thin thu a sawi bawk. Chapchar Kut hman ni atang hian Mizote hnam rohlu 'Aia upa zah' kawngah a thar a hma la leh theuh turin kalkhawm mipuite a sawm nghal bawk a ni.
Vawiin Chapchar Kut-ah hian Mizoram sorkar-in Champhai District Hqrs. a Chapchar Kut lawmna tur Cheng Nuai 2 a pek hmangin Mizo hnam lam chi hrang hrang pholang a ropui taka hman a ni a.. Sub-Hqrs. YMA Champhai huam thuthmun Branch YMA hrang hrang atanga Mizo hnamlam pholan zingah Tlanglam, Par lam, Upa (Salu) lam, Chawnglai zawn, Chheihlam, Sarlamkai, Buhza-aih, Zangtalam, Cheraw Kantluang neih anih bakah Chai a Kut hun kharna hman a ni a.
Mizo Photographers Society, Champhai-in Kut a kal Nula-te atangin Chapchar Kut Miss an thlang a, MHIP Sub-Hqrs. Champhai in naupangte Chithlum an sem bawk a. Hemi bakah hian Naupang kum 6 hnuailam Mizo hnam inchei nalh mipa leh hmeichhe naupang thlan chhuahte hnenah Kutpa in lawmman a sem bawk a ni.
