Chapchar Kut 2017 chu vawiin khan Lawngtlai Bawrhsap Pisa tualah hman a ni a. LADC CEM Pu VL Hmuaka chu Kut Pa niin, Lawngtlai Bawrhsap Dr A. Muthamma IAS chu Kut Thlengtu a ni. 

Kut Pa, Pu VL Hmuaka chuan, Chapchar Kut chu Mizote'n Kut kan neih zinga ropui ber leh tun thleng pawha kan la chhawm nun zel awm chhun a nih thu sawiin, hlim leh uar taka hman a phu a ni, a ti a. Pi pute chuan Kut laiin nupa, chhungkua leh thenawm khawveng intihbuai an duh lo va, inremna ni-ah an hmang thin tih sawiin, vawiin pawh hi inremna ni-ah hman ni se a duh thu a sawi. Mahni hnam ziarang leh nunphung zahpui lo va, humhalha chawi nun zawk a pawimawh a, chu chu Mizote'n kan vawng reng tur a ni, a ti a. Mizoram hi Zo hnahthlak hnam hrang hrangte ta a ni a, neitu bik leh thu bik kan awm lo, kan zavaia inlungrual taka kan chenna tur a ni tiin, inpumkhat duhna rilru pu tlat turin kal khawmte chu a sawm a ni. 

Kut Thlengtu Lawngtlai Bawrhsap Dr A. Muthamma chuan Kut hmang tura kal khawm zawng zawngte Kut chibai bukin, duhsakna a hlan a. Chapchar Kut chu hlimna ni a nih ang ngeia hlim tak leh nuam taka hmang tura sawmin, mahni hnam nun ze mawi te kalsan lo va, ngaihhlut nachang hre tur leh chawi nung zel turin a chah bawk. 

LADC Art & Culture Department-in hlado chhama tlang tlirin Chapchar Kut 2017 hi an hawng a. Lawngtlai khawpui chhung YLA Branch hrang hrang leh sikul naupangte'n hnam lam chi hrang hrang - cheraw, sarlamkai, chawnglaizawn, pawh loh tlawh leh chheih lam te an entir a. Lawngtlai pawn lam atanga zaithiam lo kal leh tualchhung zaithiamte'n hnam zai chi hrang hrang hmangin kal khawmte an awi a ni. 

Organising Committee ruahmannain Chapchar Kut Miss 2017 thlanna buatsaih a ni a. Miss-ah hian C. Lalhruaitluangi, Lawngtlai-III chu thlan a ni a; Runner Up-ah Lalsanghnuni Chawnhlun, Lawngtlai-III thlan niin, First Runner Up-ah Lalhmangaihzuali, AOC Veng leh Lalnunthari, College Veng te thlan an ni. Hnam thuam inbel naupangte atangin Chapchar Kut Little Miss leh Mister thlan a ni bawk. 

Vawiin Lawngtlaia Chapchar Kut hmannaah hian LADC member-te, state leh LADC hnuaia hna thawkte, thu thar theh darhtute, tlawmngai pawl hrang hrang ai awhte, khawtlang hruaitute leh mipui thahnem tak an kal khawm a. Chapchar Kut huaihawttu Addnl DC Pu H.Dolianbuaia'n lawm thu a sawi a. Hlim taka chaipui leh lam thaipui hun hmangin, Kut hi khar a ni.