Mizoram hmun dangte rualin Siaha-ah pawh vawiin chawhma dar 10:30Am atang khan District Playground, Siaha Vaihpi-ah Chapchar Kut Programme hlimawm taka hman a ni. 

Vawiin Chapchar Kut lawmna Programme ah hian Pu F. Chhawnmanga chu Kut Pa a ni a, Dr HTC Lalrinchhana, Judge Fast Track Court, Siaha District chu Kut Thlengtu a ni bawk. Kut Hawnna hla hi MYA Zaipawl, New Siaha ten sain, Pu H. Lalchhinga, New Colony chuan Hlado Chhamna hun a hmang bawk a ni. 

Vawiin Chapchar Kut lawmna ah hian Siaha District a School hrang hrang atangin Zirlai Naupangten Pawnto hmuhnawm tak an entir a, Hnam incheina leh Hnam Lam hrang hrang te chu MTP, M.CH.P., YLA, LWA, MHIP leh MGYA ten an entir bawk a ni. Vawiin Chapchar Kut lawmna chikhat atan Siaha District-a Sawrkar Department aiawhte leh NGOs’ aiawhten Inhruipawh  (Tug of War) hmanga intihsiakna hun an hmang bawk. Vawiin Chapchar Kut lawmna ah hian zaithiam Nl. B. Priskilli, Tv. Wilkinson B. Khuhly, Nl. Zodinpuii,  Nl. April JKT leh Nl. LC Laldingliani te atangin zai ngaithlak a ni  bakah Advvetist School Naupangte leh Next Generation ten Group lam hmuhnawm tak an entir bawk a ni. 

Kumtina an lo tih thin angin Miss Chapchar Kut, 2017 thlanna hun te nei niin Miss Chapchar Kut atan Nl. K. Lalchhanhimi D/o K. Lalfakzuala, New Siaha chu thlan a ni a, Best Traditional Dress hmeichhia-ah Venessa Byhnapaw Nohro D/o N. Vabeiratlua leh mipa Best Traditional Dress-ah Jehobin Lalawmrenga S/o Vanlalhluna te thlan an ni bawk. Vawiin Chapchar Kut lawmna denchhena lawmman hrang hrang dawngtu  te hnena lawmman semna hun Pu N. Chakhai, Additional Deputy Commissioner, Siaha District in a hman  hnuin, Dr Chawngkhuma Chawngthu chuan lawmthu sawinain vawiin Chapchar Kut-2017 lawmna hun hi atitawp a ni.