Zoramchhung hmun dangte rualin Mizo te’n kut kan neih zinga ropui ber Chapchar Kut chu vawiin khan  Mamit GSA Playground-ah ropui taka hman a ni a, Pu John Rotluangliana, Minister Food Civil Supply & Consumer Affairs etc chuan KUT PA niin a hmanpui a, Pi Lalbiaksangi, District Bawrhsap chu Kut thlengtu a ni. 

Kut Pa nia he hun hmanpuitu  Pu John Rotluangliana chuan kan pi leh pute’n buh leh bala malsawmna an chan theihnana lo vah zawh hal hma si, awllen laia an hman thin Chapchar Kut chu thangthar zelte pawhin kan hmang chho ve zel a, kan pi pute hun laia an nunzia zawng zawng chu chhawm nung vek thei tawh lo mah ila Mizo kan nihna chu kan thinlungah a awm tlat tur a ni a ti. Ram changkang apiangin an hnam nun dan an humhalh a, an chawinung thin keini Mizote pawh hian kan hman nunphungte humhalh chung zela kut hmang turin kalkhawmte a chah a ni. 

Kut Pa chuan Kan pi pute nunzia mawi tak AIA UPA te zahna zawi te te-in a tlahniam chho mek a, hei hi din thar leh na chang kan hriat a, kumin chapchar kut thupui AIA UPA te zah thiam chu chhawm nung thar zelin, Chapchar Kut chu Kan mizo Kristianna chhawm nung chung zela rinawmna leh dikna nen hlim taka hmang turin Kut hmangtu zawng zawngte a sawm a ni. 

Kut Thlengtu Pi Lalbiaksangi District Bawrhsap pawhin thusawiin Chapchar Kut Organising Committee 2017 te chungah lawmthu a sawi a, Mamit khawpui chhung baka District chhunga Kut hlimawm tak hman a nih theih nana mawhphurhna neitu zawng zawngte leh chhimtu mipui zawng zawngte Kut chibai bukin hlim taka Kut hmang turin a chah a ni. 

Pu Zatluanga President Sub Hqrs, YMA pawhin AIA UPA te zah uar leh zual tura fuihna thu a sawi bawk. 

Chapchar Kut Mamit khawpui chhunga hmanna ah hian Mizo hnam lam chi hrang hrang Mamit khawpui chhung YMA Branch atang te leh MCO, Mamit atangte, District chhung Kawrthah YMA leh Rawpuichhip MUP tang ten entir a ni a, khawpui chhung leh District chhung hmun hrang hrang atangin zaithiam te’n kalkhawm mipui te an awi a ni. 

Mamit-a Chapchar Kut hmanna ah hian Chapchar Kut Miss, Naupang Inchei thiam leh Kum 60 chunglam Mizo thuama inthuam nalh ber te tan lawmman siam a ni a, Mizo infiamna chi hrang hrang insaihruipawh, kalchhet inkal siak leh Insuknawr ten intihsiakna neih a ni bawk. Chapchar Kut Lawmna pual hian Mamit khawpui chhunga YMA Branch hrang hrangte chuan Mau hmanga Mizo Pa insak Inte sa-in hengah te hian mizo thilsiam chi hrang hrang pholan a ni.