Kolasib-ah Chapchar Kut 2017 chu Tumpui Field-ah vawiin khan ropui taka hman a ni a, Pu Zodintluanga, Minister UD&PA, PHE etc. chuan Kut Pa niin a hmanpui. 

Kut Pa Pu Zodintluanga chuan Kut hmangtur a kalkhawm zawng zawng te duhsakna chibai bukin, Kut ropui taka hman anih theih nana a buatsaihtu te inpekna chu ropui a tih thu a sawi a. Kut thupui "Aia upa zah" tih chu thinlunga vawng a, aia upa te zah chawinung thar zel turin kalkhawm te a fuih a ni. Kut Pa hian Kut hmangtute tan Kut Sa a thehsak a ni. 

Kumin Chapchar Kut hi Aia upa zah tih thupui a hman a nih zulzuiin, kum 75 chin chunglam tan thutna a bika siam a ni a. Kut chhimtu mipa leh hmeichhia kum upa ber hnenah chawimawina thilpek hlan a nih bakah, a kal zawng zawng te hnenah pangpar pek an ni. Kum 75 chunglam kut chhimtu hi mi 65 an awm a ni. Kut chhimtu upa ber mipa hi Pu RL Manga,  kum 94 niin, hmeichhia hi Pi Zikpuii, kum 89 a ni. 

Chapchar Kut hmannaah hian ZOOM, Kolasib thlan Kut chhimtu mipa leh hmeichhe naupang hnam inchei a inchei nalh ber te hnenah lawmman pek a nih bakah, Chapchar Kut Nula thlan a ni bawk a. Kut lawmnaah hian kolasib a YMA branch hrang hrang ten Cheraw Pui leh MHIP branch hrang hrang ten Parlam Pui an entir a. Khuangchawi MCO in entirin,  Zaithiam zai mawi tak tak ngaihthlak a nih bakah,  hnam lam mawi tak tak thlirho a ni a. Chhawnghnawh neih niin, tlai lamah Chapchar lunglen hun hlimawm tak hman a ni bawk. 

Kut pual hian mizo thil hlui leh hnam ziarang lanna thil phochhuah a ni a, hei bakah hian hnam thuam phona dawr siam a ni a. YMA sub headquarter in Archive an siam a,  Sericulture Department ten silk puanzeh mawi tak tak an phochhuak a ni. Kut chhimtu tan hulhliap zar vek a ni bawk a ni. 

Chapchar Kut ropui taka hman a nih theih nan hian sorkarin a hmanna tur Rs.2lacs a pek bakah, mi thahnemngai ten sum an thawhkhawm a. Chapchar Kut 2017 atan hian Working Committee Pu C.Lalzahngoa, SP kaihruaina hnuaiah dinin, tlawmngai pawl hrang hrang te leh official te an tel a ni.