Hortoki a Industry Department hnuaia Handloom Cluster Training zo tawhte hnenah weaving shed (puantahna in) sakna tur Rs 26,000/-  theuh Bialtu MLA Pu Hmingdailova Khiangte, Parliamentary Secretary in a sem. 

Semna inkhawm buatsaihah Pu Hmingdailova Khiangte chuan taihmakna hi hlawhtlin nan a pawimawh a ni a ti a. Dawn mai duhtawk lova eizawnna ngelnghet neih nana hmang ngei turin a fuih a.  Hnam ziarang vawng nung zel thei tura hnam thinlung pu chunga hmala zel turin a fuih a ni. Bialtu MLA hian Chapchar Kut organising Committee, Hortoki hnenah Rs.10000/-(Cheng singkhat) Chapchar Kut hman nan a pe a ni. 

Puantahna in sakna hi mi 50 hnenah sem a ni a. Puantahna in an sak hnuah endik an ni anga, tih tur ang an tih zawh hnuah puantahna khawl leh mamawh dang te pek leh an ni ang.