Chaphchar Kut 2017 chu vawiin khan Mizoram hmun dang rualin Home Minister Pu R. Lalzirliana hovin Sialhawk Lal Mual zawlah hman a ni. 

Kut Pa Home Minister chuan Mizote Kut lian ber hmang theia khawtlangin hun a buatsaih chu lawmawm a tih thu a sawi a. Hnam inthuam mawi tak tak kan inbel hi pawnlam mawina atan chauh duhtawk mai lovin, kan hnam nihna leh nun zemawi inthuam hian kan nun chhungril ah theuh pawh kan inbel tur a ni, a ti a. Minister Pu R. Lalzirliana chuan aia upa zah theilo khawp a mi ropui an awm theilo a, an awm ta reng a nih chuan chu ropuina chu a zahawmloh a ni, a ti a. Hnam ropui leh hmasawn apiangin hnam pawimawhna leh nihna(identity) an ngaihsan thin thu a sawi a. Mizo kan nihna hi pawnlam thliin a tihkhawloh theih miahloh turin kan nihna hi kan chawisang tur a ni, a ti. 

Home Minister chuan NLUP chhawr tangkaia mi harsa intungding ta an awm zel avangin sawrkarin chhunzawm tha atih avanga constituency tin atangin NLUP beneficiary tur mi 30 chuang theuh tunah thlan anih mek thu a tarlang a. NEDP hnuaiah pawh mi thawktha peihte puih nan hmalakna lian tham tak siama hmalak zel a nih thu tarlangin, Agriculture Link road chu kuthnathawktute tan a tangkai em avangin Sialhawk khua tan pawh NEDP hnuaiah agriculture link road siam leh cheithat nan Cheng Nuai 25 dah a nih thu a sawi bawk. 

Sialhawk a Chapchar Kut lawmnaah hian Home Minister hi Champhai District-a RD leh Police Department lama hotuten an tawiawm a ni.