58/2026-2027

Lunglei, 2026 Ṭau thla ni 7: Vawiin khan Administrative Training Institute (ATI), Mizoram, Aizawl bul tumin ni hnih chhung awh tur, Mizoram chhim lam district pali – Lunglei, Siaha, Lawngtlai leh Hnahthial te tana office inenkawl dan leh sum vawn dan zir hona, "Special Training on Functional Efficiency in Establishment and Accounts Matters" chu BCM Hall, Serkawn, Lungleiah ṭan a ni.

April ni 7–8, 2026 chhunga training kalpui tur hawnna hun hi ATI Director Pi Rita Lalnunmawii Pachuau chuan kaihruaiin, hawnna thu a sawi a. ATI-in Lungleia kal chilha training a buatsaih chu Southern Zone District 4 huam chhunga sawrkar hna thawk, hmun hla zawka training kal harsatte tana ruahman a nih thu a sawi a. Hna zahawmna chu a thawktuin a hna a thiamnaah a innghat tih sawiin, sawrkar hna thawkte chu eng tik lai pawha inzir tur an nih thu leh inzir peih apiang chhawr tlak leh duhsak hlawh an nih ṭhin thu a sawi a. Training tura kal khawmte chu an hna thawhin mipui a nghawng tih leh mipui tana thawk an ni tih hria a, an hna thawh danah leh mipui an thawhpui danah ṭan la zel tur te, training chu hlawk tak leh a ṭangkai thei ang bera hman tum tur te'n a chah.

Training hawnna hun hi Lunglei District Bawrhsap Pi Navneet Mann chuan hmanpuiin, sawrkar hna thawkte chu sawrkar ṭha siamna atana hmanraw pawimawh an nih thu leh ṭha taka hna thawk thei turin tun lai hmasawnna mila intah hriam reng a ṭul thu a sawi a. Sawrkar laipuiin iGOT Karmayogi kal tlangin sawrkar hna thawkte'n an thiamna an tihpun leh an tah hriam zelna tur ruahmanna a kalpui tih sawiin, chumi tihhlawhtlinna peng khat atana ATI-in sawrkar hna thawkte thiam tur pawimawh hrang hrang zir hona hun a buatsaih chu lawmawm a tih thu leh chhim lam district aṭanga training-a telte'n an hlawkpui ngei a beisei thu a sawi.

Course Director, ATI Deputy Director (Training) Pu Lalbiakenga chuan report pein, he training hi April ni 2–8, 2026 chhunga kalpui mek, SADHANA (Strengthening Adaptive Development and Humane Aptitude for National Advancement) Saptah – National Learning Week puala huaihawt a nih thu a sawi a. National Learning Week-in a tum ber chu sawrkar hna thawkte'n mahni hna ṭheuh leh mawhphurhnate thiam bel tak leh hnemhnanpuiawm zawka an thawh theih nana mahni hna leh ni tin khawsaknaa hman ṭangkai theih tur zir belh a nih thu a sawi.

Mizoram chhim lam district pali te tana Special Training buatsaih tur hian ATI Director Pi Rita Lalnunmawii Pachuau hovin ATI officer leh staff-te chuan nimin khan Lunglei thlengin, vawiin chawhma dar 10 aṭang khan training hi ṭan a ni a. Sawrkar hna thawkte'n ni tin office hna an thawhnaa an hman tur Rules ṭangkai tak tak – FRSR, CCS (CCA) Rules, Conduct Rules/Leave Rules, DPC Procedure, Service Book, Probation & Confirmation, Basic Accounts Matter, Dak & File Management, Pay & Allowances, NPS, Leave Rules leh Vacancy Based Roster-te bakah, soft skill lam subject – Ethics & Values, Problem-Solving & Decision-Making leh Mental Health chungchangte chu ni hnih chhungin ATI Officer/Faculty-te'n an zirtir dawn a ni.

He training-ah hian sawrkar hna thawk – Group A, Group B leh Group C te telin, Lunglei District aṭangin mi 80, Siaha District aṭangin mi 21, Lawngtlai District aṭangin mi 30 leh Hnahthial District aṭangin mi 25, an vaiin mi 156-in training hi an chhim a. ATI Director Pi Rita Lalnunmawii Pachuau, Joint Director (Training) Pi Lalrimawii Hmar, Deputy Director (Training) Pu Lalbiakenga, Deputy Director (Finance & Accounts) Pu F. Lalremmawia, Core Faculty Pi Golda Dell Zohmangaihi, Assistant Director Pu B. Tlangdingliana leh Assistant Director Pu Joseph Lalhmangaiaha te'n training hi an pe a. Zawhna leh chhanna leh sawi hona hun te hman ṭhin a ni bawk.