57/2026-2027

Dated Serchhip, the 7th April 2026: Vawiin khan Serchhip district Deputy Commissioner Pu Paul L. Khuma kaihhruaiin, NMBA District Level Committee chuan Nasha Mukt Bharat Abhiyan hnuaia hmalakna peng pakhat atan, ‘Hriselna Kut - Health Camp’ Serchhip-a huaihawt chungchang an sawi ho.

Chairman Pu Paul L. Khuma chuan ruihhlo dona kawnga Serchhip District hmalaknate sawiin, thalaite’n ruihhlo-in hriselna leh khawtlang nun a tih chhiat nasat theih dan te, hriselna ngaih pawimawh nachang an hriat a pawimawh thute a sawi a; inzirtirna uar lehzuala kalpui a nih theih nan leh thalai mai bakah mipui nawlpuiin an pan theih turin, Serchhip district-ah ‘Hriselna Kut – Healh Camp’ hi buatsaih tum a nih thu a sawi.

He Hriselna Kut-ah hian a duh apiangte’n a thlawna an hriselna dinhmun an entir theihna tur te; damdawi a thlawn emaw, man tlawm zawk emawa an hmuh theih dan tur te; District Hospital-a thawklaite bakah Serchhipa inentirna la awm ve rih lo, natna thenkhata thiam bikna nei daktawr chah chhuah an nih tur thu te; hmanhmawh thil thua damlo sawngbawl dan First-Aid Basic Training leh thih thut theihna pumpelh theih dan emergency response hrang hrang inzirtirna te; ei leh in leh nun danin a zir loh avanga natna hrang hrang awm thei chungchang inzirtirna te; ruihhloin hriselna a nghawng theih dan hrang hrangte he Kut-ah hian awm tura ruahman a nih thute a sawi bawk.

Hriselna Kut - Health Camp hi ruahman dan chuan kumin May thla chawhma lama neih hman tum niin Serchhip Deputy Commissioner Office tualzawlah neih tum a ni a, a tul anga hmalak zui nghal tura rel a ni.

Vawiin meeting-ah vek hian Sub-Divisional Police Officer Pi Lalrinzuali’n ruihhlo dona tura Police Department-in ruahmanna Action Plan an siam chungchang sawi zauna a nei a, ngawrh lehzuala ruihhlo tawlhrukna chhuitu tur Special Investigation Team, sawrkar department bakah Assam Rifles, BSF, YMA leh Joint VC-te telna tur din tur chungchangte sawi ho a ni bawk.