391/2026-2027

Lunglei, 2026 Ṭomir thla ni 6: Mizoram Chief Minister Pu Lalduhoma'n May ni 8, 2026 (Zirtawpni)-a Lunglei a tlawh tur chungchangah amah hmuah dan tur leh lo dawnsawn dan tur ngaihtuahin vawiin khan Lunglei District Bawrhsap Pi Navneet Mann kaihhruaiin a hna thawh pindanah sawrkar official-te an ṭhu khawm.

He hunah hian Chief Minister-in Lunglei a tlawh huna hun hman dan tur ruahman lawk tlangpui thlir ho a ni a. Ven himna lam leh lirthei chet vel dan tur ruahmanna te, medical duty leh service pawimawh hrang hrang ruahmanna te, department leh pawl hrang hrang tih tur leh mawhphurhna te, hlawhtling tak leh tluang taka hun hman a nih theih nana inpuahchahna leh inbuatsaihna tur thil ṭul leh pawimawh hrang hrangte sawi ho a ni.

Ruahman lawk dan chuan, Chief Minister hian May ni 8, 2026 (Zirtawpni) chhunah Lunglei thlengin, 2nd Bn MAP Ground leh C. Ṭhuamluaia Mualah NCC Fest & Parasailing Camp a hmanpui ang a. Tlai lamah Civil Hospital Lunglei & Health ATM, Leitlangpui High School & Cosmic Classroom leh hmun pawimawh dangte a tlawh ang a. Lungleiah zan riakin, May ni 9, 2026 (Inrinni) zingah Lunglei Municipal Council (LMC) Office a tlawh ang a. Tukṭhuan ei khamah Lunglei a chhuahsan ang.