Lunglei District Child Protection Unit, Lunglei Police leh Lunglei Special Court-te tangkawp buatsaih naupang kum tlinglo dan bawhchhiate leh dan bawhchhiatna avanga tuartute ngaihngam taka an awm theihna hmun tur ‘Child Friendly Corner’ chu Lunglei Police Station leh Lunglei Special Court-ah te nimin chawhnu khan DIGP Southern Range Pu Rajneesh Gupta, IPS in a hawng. He hunah hian Lunglei SP Pu C.Lalthanmawia leh a thawhpuite, official dangte, Lunglei Child Welfare Committee (CWC) member-te, tlawmngaipawl aiawhte leh sawm bik dangte an tel.

Hawnna inkhawm Pi S. Lalrotluangi DCPU kaihhruaiah Pu Rajneesh Gupta chuan he hmun siamna atana District Child Protection Unit (DCPU) a thawktute inpeknaah lawmthu sawiin, Child Friendly Corner chu pawikhawihna tuartu naupangte leh naupang pawikhawihte enkawl leh venhimna atana tangkai taka hman a nih ngei a beisei thu a sawi a. Naupangte hmangaih taka enkawla an dikna chanvo humhalh kawnga nasa taka hnathawktute – DCPU, CWC, MHIP leh tlawmngai pawl dangte, Police leh Law & Judicial lama hnathawk kalkhawmte  chungah lawmthu sawiin ram leh hnam tana mi hlu leh pawimawh tak an ni, tiin an kal zelna turah duhsakna a hlan a. Lunglei Special Court leh Lunglei Police Station building-a Child Friendly Corner an siam thar chu ribbon chep chatin a hawng a ni.

He hunah hian Pu Malsawmdawngzuala,  Member CWC Lunglei & Addl Public Prosecutor pawhin thu sawiin naupang, Police Station leh Court ah te hruai ngei a tul chang a awm thin a, Juvenile Justice Act leh Rules in a phut angin naupangin thlamuang taka Police Station leh Court ah te hun an hman theihna tur chu Lunglei Police, Lunglei Special Court leh District Child Protection Unit ten thawhhona tha tak an neih avanga siam puitlin a ni ta chu lawmawm a tih thu a sawi a. Child Friendly Corner ah hian naupang in awm tleina tur thilte leh TV set te dah anih thu a sawi a ni.

Family Counselling Centre, Lunglei Police station enkawl mek tu MHIP Sub Hqrs Lunglei atang pawhin thusawi ngaihthlak niin Pi Lalrinkimi Hmar, DCPO Lungle in lawmthu sawina hun a hmang a. Children’s Day puala Open Photography Competition buatsaih lawmman dawngtute hnenah Lunglei SP Pu C.Lalthanmawia’n Citation leh pawisa fai hlanna hun a hmang bawk.