Beti Bachao Beti Padhao hi India sawrkar Flagship Programme, Ministry of Women & Child Development in a kalpui mek a ni a. A awmzia chu fanu chu venghim la, zir puitlin tir rawh tihna a ni.

India ramah fanu te hian fapate aia -duh loh zawk - nih an lo hlawh tawh thin avang te, India ram mipui pun chhoh zel danah hmeichhiate punna chu rampum huapa mipate punna aia a hniam thin avangin, hmeichhiate humhima, an lo puna, mipate tih ang leh nih ang te hi an ni thei vek a ni tih lan tir leh India ramah hian mipa leh hmeichhiate hi kawng engkimah an intluk tlang vek a ni, tih hi nasa zawka inzirtir a tul nia hriat a nih avangin Fanu te chu venghima, zirtir puitlin ngei a tulzia puanzara inzirtirnan - Beti bachao Beti Padhao hi a lo piang ta ni.

He hmalakna hi District bila kalpui thin niin Serchhip District pawh kum 2018-19 atang khan kalpui tan tura thlan a ni a, tichuan District Task Force te, Block Task Force te din a ni ta a. District Task Force Chairman hi Bawrhsap niin Line Department engemawzat an awm a, Block level ah BDO te chu Chairman niin an Block chhunga District Task Force in hmalakna tur a duan te chu an lo bawhzui ve leh a ni. Tin, sawrkar laipui chuan Serchhip District ah Mahila Sakti Kendra Scheme a rawn kalpui nghal bawk a, a hnu zelah anni hi district chhunga BBBP hmalakna kutken zuia vil zuitu pawimawh tak an ni chho ta a ni.

District Task Force on BBBP te chuan sawrkar laipui duh danin hmalak dan tur Action Plan an han duang a, an thil duan chu sawrkar laipui bawkin an lo pawm sak hnuah chung ruahmanna te chu a taka thawh tan a ni ta a, line Department te chuan - Serchhip District in Fanu thar a neih apiangte lo lawma, lo venhima, zirtir puitlin ngei an nih theihna tur hmalakna chu an thawk ta mur mur mai a ni.

Tichuan, favang a lo her chhuaka 5th October 2018 khan Monthly Girl Child Day lawmna ni pah fawmin District task Force Chairman Pi Sangchhin Chinzah, Serchhip Bawrhsap chuan official takin Serchhip District chhunga BBBP hmalakna hi a hawng ta a. He ni chhinchhiah tlak takah hian BBBP hmalakna tam tak chhawpchhuah an ni.

Hmalakna langsar te i han tarlang dawn ang aw -

A hmasa berah chuan - Kan district chhunga hriselna lama hnathawk hmatawng heng VHSNC/ASHA/HWs/ Anganwadi Workers zawng zawng te chu Fanu thar te humhima duat lehzuala lo enkawl dan tur leh BBBP hmalakna kalphung te zirpuina neih pui vek an ni a.

District chhunga Police te,  Court lama hnathawk te leh Officers pawimawh te chu he hmalakna leh he hmalaknain a ken tel dan chi hrang hrang te training neih pui vek an ni.

BBBP hian Local Champion kan nei a, chu chu tudang nilovin vawiina Indian Hockey Player pawimawh leh langsar tak Lalremsiami chherchhuaktu, Sports Authority of India, Thenzawl Hockey Academy Chief Coach Pi Lalrampari a ni.

Pi Lalrampari kaihhruaina hnuaiah hian district chhunga hmeichhia naupang Hockey lama talent nei thate zawn chhuahna neih zui nghal a ni a, Khawlailing, E. Lungdar ah leh Lungpho khuah te exhibition Match khelin  Lungpho ah hian hmeichhe naupang talent tha tak nei hmuhchhuah a ni a, Thenzawl Hockey Academy lamah lakluh nghal a ni.

Fanu duhawm tak tak min hrin sak thintu, nu te tan pawh hmalakna duhawm tak tak siam a ni. Nu in nau a pai laia a naupai enna khawl, District Hospitala Ultrasound khawl thuam tharna tur sum BBBP atang hian pek a ni a.

Naupai ten 1st trimester chhunga sub-centre a an inreport chuan lawmman lo pek thin an ni.
District chhunga hmunpui hlat deuh hlek Sub-Centre thlan chhuah 7 te hnenah nau neihna hmanraw tha tak tak BBBP sum hmang hian chhawp sak an ni a. Sawrkar ruat nau neih theihna hmun ngeia fa hringte hnenah lawmman pek niin tun thlengin nu 130 te hnenah he lawmman hi sem tawh an ni.

Fanu thar lo piang chu khawtlangin a lo lawm hle a ni tih entir nan District chhunga MHIP Branch zawng zawngte hnenah Fanu thar lo enna tur nau puan pek  vek an ni a. An branch chhunga fanu thar lo piang chu an lo en thin  ani.

Thla thar ni 5 ni apiang chu Fanu thar lawmni atana ruat niin he niah hian District Hospital-ah fanu thar en tur an awm phawt chuan BBBP District Task Force hotuten an en thin a. Thilpek te an hlan thin a ni.

Hmeichhe naupang school bansan tawh te zawn chhuah runpui leh sikula luhtir lehna beihpui thlak neih a ni tawh a. Chutiang hna thawk tha zirtirtute pawh chawimawina hlan an ni. School titha 10 hnenah pawh hlan an ni.

Hmeichhe zirlai thiamthei bikte tan Special Scholarship pek an ni a

Anganwadi lamah pawh BBBP Kit chi hrang hrang sem an ni bawk.

BBBP hmalakna pawimawh em em mai chu _ Media Campaign hi a ni.

District chhunga Branch YMA, chanchinbu nei zawng zawngte chanchinbuah BBBP chungchang inhrilhhriatna Display Advertisement tihchhuah vek a ni a. Serchhip atanga tihchhuah Newspaper ah te pawh advertisement hi tihchhuah an ni.

BBBP inhrilhhriatna leh fanute enkawlna kawnga inzirtirna Wall Painting te, Leaflet te, Calendar te, Logo thehdarh hna te, Cartoon thehdarh hnate nasa taka thawh a ni a, Social Media Platform hrang hrangah heng mipui zirtirna te hi tihchhuah niin thehdarh reng a ni.

Khawtinin an khuaa naupiang thar an neihzat leh mipa nge a nih hmeichhia tih an lo hriat ve zel theih nan Guddi-Gudda Board sem vek an ni a, an khaw chhung hmun laili laiah an tar hlawm a ni.