528/2024-2025

LUNGLEI; the 21st May, 2024: Vawiin chawhma khan DC Conference Hall, Lungleiah Clinical Establishments (Registration& Regulation) Act 2010 leh Mizoram Clinical Establishments (Registration & Regulation) Rules 2014 chungchangah Hospital, Clinic, Diagonostic Laboratories (Govt.leh Private) neitu te tan Online Registration chungchang training neih a ni. He hun hi Lunglei Bawrhsap Pi Ramdinliani, IAS chuan a hmanpui.

Pi Ramdinliani  chuan Clinical Establishments (Registration & Regulation) Act 2010 leh Mizoram Clinical Establishments (Registration & Regulation) Rules 2014 hi Mizoram Sorkar in a ngai pawimawh a, State Sorkar rem tihna tel lova hman theih a ni lova, chuvangin he dan hi Clinical Establishments ten an zawm a ngaih thu a sawi. Training hi hlawkpui a, mahni Clinical Establishments theuhah ennawn nan leh hmasawn nan hmang a Lunglei mipui te an lo hrisel zawk nan hmang theuh tur a chahin registration te a hun tak a ti theuh turin a chah bawk a ni.

He hunah hian Pu James Miahlung, Addl. Deputy Commissioner, Lunglei pawh in thu sawiin khawtlang inrelbawlnaah service hrang hrang a awm a, chungah chuan Health Service hi a pawimawh hle a mihring thih leh dam kar a ni, a ti a. Hriselna enkawltu an nih avangin Missionary rilru pu chunga hna thawk a, mipui tan a ding an nih angin service tha tak pe theuh turin a fuih a ni. Sorkar in dan a siam a, chu dan a siam chu zawm theuh turin Clinical Establishments te a chah bawk a ni.

Dr. Elizabeth C. Lalmuanpuii, District Level Coordinator, CEA Lunglei chuan Clinical Establisments Act. Cum Online Registration of Clinical Establishment chungchang power point presentation hmangin zirtirna a pe bawk.

The Mizoram Clinical Establisments (Registration & Regulation) Act & Rules 2014 hian Hospital, Clinic leh Diagonostic Laboratories (Sorkar leh Private) te a huam a, Armed Forces te chu a huam ve lo a ni.