DIRECTORATE OF INFORMATION & PUBLIC RELATIONS, Government of Mizoram, India

4323/2025-2026

Lunglei, 2026 Ramtuk thla ni 6 : Land Resources, Soil & Water Conservation Department (LRS&WC) hma lakna Chief Minister's Rubber Mission Mizoram hnuaia Lunglei, Siaha, Lawngtlai leh Hnahthial District chhunga ṭhelret (rubber) chingtu leh ching turte tan vawiin khan Lunglei Convention Centre-ah rubber chin, enkawl, hnai leh sawngbawl dan zir hona, "Farmers Training on Scientific Rubber Cultivation, Harvesting Techniques, Post-Harvest Handling and Pest Management" buatsaih a ni a. LRS&WC Minister Pu Lalthansanga chu Khuallian niin, Lunglei South bialtu MLA Pu Lalramliana Papuia chu Khual Zahawm a ni.

Khuallian Pu Lalthansanga chuan ram mipuite'n mahni kutkea din theihna tura ke penpui thei tur sawrkar an mamawh tih sawiin, tuna Mizoram sawrkar hian mipui mamawh chhanna ni turin theih tawpin hma a la mek tih a sawi a. CM Rubber Mission chu Chief Minister kaihhruaina hnuaia sawrkar hotu lu ber aṭanga department zawng zawng tela kut hna thawktute tana hma lakna a nih avangin a namai lovin, a hlawhchham thiang lo tih sawiin, tih tak takna nena beih a, tihpuitlin ngei ngei a ngai tih a sawi a. Rubber chingtute chu kum 4 chhung enkawl zuipui an nih tur thu leh thiamna sang zawk nen sawrkarin a enkawlpui tur thu sawiin, CM Rubber Mission hnuaiah hectare 11,500-a zauva hma lak tum a nih laiin Phase I & II-ah hectare 3,575 chuang awrhah chauh kalpui a la nih avangin ching duh zelte tan pawh kawng a la inhawng zau tih a sawi a. Phase-III & Phase-IV a la awm zel dawn thu leh Phase-IV-ah chuan a ching tawhte tan a hmun zauhna (expansion) pawh tel thei tura ruahman a nih thu sawiin, sawrkarin dawng tlaka a ngaih chuan an dawn vek tur thu leh party anga inthliarna a awm dawn loh thu a sawi.

Minister Pu Lalthansanga chuan rubber chu a hnai chhuah ṭhat hun zing dar 3 vel aṭanga zing dar 7 vel inkara hnai ngai a nih thu leh a chin chungchang bakah a hnai danah taimak a ngaih thu sawiin, mihring tluk deuhthawa duat leh dimdawi taka enkawl ngai a nih avangin a enkawl dan hre chiang tura training a pawimawh thu a sawi a. A ching turte chuan tuipui zawl (sea level) aṭanga teha metre 500 aia sang lovah a hlawk tih hriat tel a, mahni ram dinhmun hriat chian a pawimawh thu sawiin, a chin dan dik zawm loh chuan hlawhchhamna leh beidawnna a thlen theih avangin rubber ching turte chu training-a an thil zirte leh mi thiamte kaihhruaina zawm hram hram turin a chah a. Rubber chin tur chu a hnai hlawk tur Study Team te zir chianna aṭangin a chi ṭha, Rubber Board of India-in a pawm ngei sem tum a nih thu leh phun aṭanga enkawlna tur leiṭha pawh zir chian leh mek a nih thu a sawi a. Ruihhlo ngawl vei zingah CM Rubber Mission avanga nghei an awm tawh tih sawiin, kut hna thawktute din chhuahna tur leh retheihna avanga nun kawng dik lo zawh tawhte chhanchhuahna turin rubber chang lovah pawh hma lak zel tum a nih thu a sawi a. Rubber chingtu kal khawmte chu hlawhtlin tum ngei tura chahin, training chu a khuh hawnna chauh a ni tih hria a, mahnia inzir belh zel a, taima tak leh rinawm taka hna thawk turin a chah.

Khual Zahawm Pu Lalramliana Papuia chuan Mizoram sawrkar hmachhawp hrang hrang zingah CM Rubber Mission chu Chief Minister leh a changtu Minister te'n an tuipui tlat a nih thu leh ram tan hmasawnna nasa tak thlentu tura beisei a nih thu a sawi a. Phase-I & Phase-II kalpui tawhah Lunglei District-ah ram hectare 370-a zauvah a chingtu 300 vel an awm tih sawiin, MIRSAC survey aṭangin Lunglei District chhungah hectare 1,030 bawr vel rubber chinna tur ram duhthusam leh hectare 640 vel a chinna tlak tho ram la awm chu chhawr ṭangkai a nih a, CM Rubber Mission hnuaiah chuan ram zau zawkah hma lak belh zel theih a nih a beisei thu a sawi a. Rubber chin chu ei zawnna bulfuk nghet leh him nia a hriat thu sawiin, rilru nghet tak leh phur taka, tih tak takna nena ṭan la turin rubber chingtute chu a chah.

LRS&WC Secretary Pu R. Lalbiakzuala'n hun kaihruaiin, hun hman chhan leh CM Rubber Mission chungchang a sawi fiah a. Baptist Church of Mizoram (BCM) General Secretary Rev. Dr H. Lalthlamuana chuan hunserh hmangin, Lunglei District Additional Deputy Commissioner Pi Rochuangkimi Khenglawt leh Mizoram Rubber Society (MIRSO) President Pu K. Hrangzuala te'n thu an sawi bawk a. LRS&WC Joint Secretary Pu Mark Lalthanliana'n lawm thu sawiin hun khatna a khar.

LRS&WC Joint Director (Administration) Pi Rosy Lalmuansangi Hmar kaihhruaiin hun hnihna, training hun hman chhunzawm a ni a. LRS&WC-a ASCE & OSD–Rubber Pu C. Laldanmawia chuan rubber chin dan, hnai dan leh hnai hnua sawngbawl zui dan a zirtir a. LRS&WC-a ASCE Pu Lalrammuana Sailo chuan ei chhetu rannung laka rubber ven him dan leh enkawl dan (pest management) a zirtir bawk a. Zawhna leh chhanna leh sawi hona hun hman niin, LRS&WC Lunglei District Officer Pu F. Lalramnghinglova'n lawm thu sawiin hun a khar.

He hunah hian Lunglei Municipal Council Chairman Pu Lalzuithanga leh councillor-te, LRS&WC Director Er Vanlalmuanpuia Chhangte leh LRS&WC-a thawktute, Lungleia sawrkar official-te, MJA te, political party hruaitute leh rubber chingtute an tel.

Vawiin training-ah hian Mizoram chhim lam district pali — Lunglei, Siaha, Lawngtlai leh Hnahthial aṭangin rubber ching mekte leh la ching tur mi 200 koh an ni a. CM Rubber Mission Phase-II hnuaiah hian rubber chinna atan Lunglei District-ah ram hectare 370-a zau, Hnahthial District-ah hectare 80, Lawngtlai District-ah hectare 80 leh Siaha District-ah hectare 20-a zau te ruahman a ni.

Lunglei District-ah rubber chinga buaipuitu kut hna thawktu 300 chuang awm mekin, kum khatah quintal 1,000 dawn an thar chhuak tawh a. A hralhnaah buaina awm lovin, an huanah ngei an hralh thei reng a. MIRSAC data aṭanga a lan danin, Lunglei District-ah hian rubber chin theihna hmun (potential area) — Class 1 square kilometre 1,033.23-a zau leh Class 2 square kilometre 640.39-a zau a awm a. CM Rubber Mission Phase II-ah hian cluster (zau) 19-ah, ram hectare 370-a zauvah hma lak ṭan mek a ni a. CM Rubber Mission hnuaia rubber chingtute hi hectare khatah rubber ṭiak 450 zel pek an nih dawn bakah, a enkawl zuina tur leiṭha leh hna thawhna tur te pek an ni dawn a, mi thiamte kaihhruaina te nen vil zui reng an ni ang.

Attachment