4322/2025-2026

Dated Serchhip, the 6th February, 2026: Vawiin khan Serchhip District Convergence meeting neih a ni a. District chhunga sawrkar laipui scheme hrang hrang kalpui mek te awmze nei leh hlawk zawka hman tangkai a nih theih nan thawhho dan tur an rel.

Meeting hi Serchhip bawrhsap Pu Paul L Khuma chuan kaihruaiiin sawrkar programme hrang hrangte awmze nei zawka hmer khawm dan tur chungchang sawiho a ni a.

"Department hrang hrang ten kan scheme neihte mipui ten hlawk zawka an hman ṭangkai theih nana kan luan khawm hi a pawimawh tak zet a ni" tiin Bawrhsap chuan mahni kal kala kan kal hian hna inbawhthuah a awm duh hle a, mipuiin hlawkna kan tel tam tawk loh phah nia a lan thu sawiin department hrang hrang hotute chu theihtawp chhuaha convergence ngai pawimawh turin a ngen a ni.

He hunah hian Dr. Malsawmtluanga Fanchun, Project Director, DRDO Serchhip chuan ni za inhlawhna - MGNREGA hnuaia hna thawh theih hrang hrangte sawifiahin a kaihhnawih department hrang hrangte nena hma lak ho theih dan turte a chhawp chhuak a ni.

Meetingah hian PWD, PHED, Horticulture, AH & Vety, Fisheries, Sericulture, LAD,Women & Child Development, Irrigation & Water Resources, Land Resources, Agriculture , Soil & Water Conservation bakah RD Department hotute an tel a ni.